കോഴിക്കോട്: തിരുവനന്തപുരം, കൊല്ലം, കോഴിക്കോട് പ്രവര്‍ത്തിച്ചിരുന്ന വഖ്ഫ് ട്രൈബ്യൂണല്‍ ഓഫിസുകള്‍ കുറവുവരുത്തി കോഴിക്കോട് മാത്രമാക്കി പരിമിതപ്പെടുത്തിയ കേരള സര്‍ക്കാര്‍ നടപടി പുനഃപരിശോധിക്കണമെന്ന് സുന്നി യുവജന സംഘം സംസ്ഥാന ജനറല്‍ സെക്രട്ടറി സയ്യിദ് മുഹമ്മദ് കോയ ജമലുല്ലൈലി വര്‍ക്കിങ് സെക്രട്ടറിമാരായ അബ്ദുല്‍ ഹമീദ് ഫൈസി അമ്പലക്കടവ്, പിണങ്ങോട് അബൂബക്കര്‍ എന്നിവര്‍ പ്രസ്താവിച്ചു.
പാലക്കാട് മുതല്‍ തിരുവനന്തപുരം വരെയുള്ള 35 ശതമാനത്തിലധികം വരുന്ന മഹല്ലുകളുടെ കേസുകള്‍ കൂടി ഇനി കോഴിക്കോട് ഓഫിസ് പരിഗണിക്കണം. ഇപ്പോള്‍ തന്നെ തീര്‍പ്പ് കല്‍പിക്കാതെ ധാരാളം കേസുകള്‍ കെട്ടിക്കിടക്കുകയാണ്. വഖ്ഫ് ബോര്‍ഡിന്റെ അപ്പീല്‍ പരിഗണിക്കാന്‍ അധികാരമുള്ള ജുഡിഷ്യല്‍ സൗകര്യം ഇല്ലാതാക്കുന്നതിലൂടെ മഹല്ല് പ്രവര്‍ത്തനം കുഴഞ്ഞുമറിയും. 'കെട്ടിക്കിടക്കുന്ന'പരാതികള്‍ തീര്‍പ്പുണ്ടാക്കുന്നതിന് കൂടുതല്‍ സൗകര്യം ഒരുക്കുന്നതിന് പകരം ഉള്ളത് നിര്‍ത്തലാക്കിയത് പുനഃപരിശോധിക്കണമെന്നും നേതാക്കള്‍ പറഞ്ഞു.