റിയാദ്: രാജ്യത്ത് വിവിധ മേഖലകളിൽ സഊദി വൽക്കരണം ശക്തമാക്കിയെങ്കിലും കഴിഞ്ഞ വർഷം അനുവദിച്ച തൊഴിൽ വിസകളിൽ മുൻ വർഷത്തേക്കാൾ ഇരട്ടിയെന്ന് കണക്കുകൾ. 2018 ൽ അനുവദിച്ചിരുന്നതിനേക്കാൾ ആറു ലക്ഷം അധികം വിസകളാണ് തൊഴിൽ, സാമൂഹിക വികസന മന്ത്രാലയം കഴിഞ്ഞ വർഷം അനുവദിച്ചത്.

വിവിധ മേഖലകളിൽ ശക്തമായ സഊദി വൽക്കരണം നടക്കുമ്പോഴും രാജ്യത്തേക്കുള്ള വിദേശ തൊഴിലാളികളുടെ ആവശ്യം മോശമല്ലാത്ത രീതിയിൽ വേണമെന്നതാണ് പുതിയ കണക്കുകൾ സൂചിപിക്കുന്നത്. നിരവധി മേഖലകളിൽ സൗദിവൽക്കരണം നടപ്പാക്കുന്നതിന് ശ്രമിക്കുന്നതിനിടെയും തൊഴിൽ, സാമൂഹിക വികസന മന്ത്രാലയം വിദേശങ്ങളിൽ നിന്ന് തൊഴിലാളികളെ റിക്രൂട്ട് ചെയ്യുന്നതിന് വൻതോതിൽ വിസകൾ അനുവദിക്കുകയാണെന്നും വ്യക്തമാക്കുന്നു. 2019 ൽ സഊദി തൊഴിൽ മന്ത്രാലയം വിദേശികളെ വിവിധ തൊഴിലുകളിലേക്ക് റിക്രൂട്ട് ചെയ്യുന്നതിനായി പന്ത്രണ്ട് ലക്ഷം തൊഴിൽ വിസകളാണ് അനുവദിച്ചത്.

കഴിഞ്ഞ വർഷം മൂന്നാം പാദത്തിൽ മന്ത്രാലയം ആകെ 6,06,400 തൊഴിൽ വിസകളാണ് അനുവദിച്ചത്. ഇതിൽ 3,48,880 വിസകൾ സ്വകാര്യ മേഖലക്കായിരുന്നു. എന്നാൽ,അതിനു തൊട്ടു മുമ്പുള്ള വർഷം കാലയളവിൽ 2,51,320 തൊഴിൽ വിസകളാണ് മന്ത്രാലയം അനുവദിച്ചിരുന്നത്. ഇതിൽ തന്നെ സ്വകാര്യ മേഖലക്ക് അനുവദിച്ചത് 87,500 വിസകൾ മാത്രമാണ്. 2018 ൽ മൂന്നാം പാദത്തിൽ അനുവദിച്ച ആകെ വിസകളിൽ 57.5 ശതമാനവും സ്വകാര്യ സ്ഥാപനങ്ങളാണ് നേടിയത്. സ്വദേശികൾക്കിടയിലെ വർധിച്ച തൊഴിലില്ലായ്മക്ക് പരിഹാരം കാണുന്നതിന് ശ്രമിച്ച് സമീപ കാലത്ത് നിരവധി മേഖലകളിൽ തൊഴിൽ, സാമൂഹിക വികസന മന്ത്രാലയം സഊദി വൽക്കരണം നടപ്പാക്കിയിട്ടുണ്ട്. ഇതിനിടയിലാണ് വിദേശികളെ തേടി ഇത്രയും അധികം തൊഴിൽ വിസകൾ അനുവദിച്ചതെന്നത് ഏറെ ശ്രദ്ധേയമാണ്.