നിലമ്പൂര്‍: മലപ്പുറം ജില്ലയിലെ റബറുത്പാദക സംഘങ്ങളുടേയും റബര്‍ ബോര്‍ഡിന്റെയും സംയുക്ത സംരഭമായ നിലമ്പൂരിലെ തുഞ്ചത്ത് എഴുത്തച്ചന്‍ റബേഴ്‌സ് കമ്പനി ആഭ്യന്തര വിപണിക്കൊപ്പം വിദേശ വിപണിയിലും ചുവടുറപ്പിക്കുന്നു. ബ്രസീലിലേക്ക് നാല്‍പത് ടണ്‍ എ എക്‌സില്‍പെട്ട ഒന്നാം നമ്പര്‍ റബര്‍ കയറ്റി അയച്ചുകൊണ്ടാണ് തുടക്കം കുറിച്ചിരിക്കുന്നത്.
കോട്ടയം ജില്ല കഴിഞ്ഞാല്‍ ഏറ്റവും കൂടുതല്‍ റബര്‍ ഉത്പാദിപ്പിക്കുന്നത് ജില്ലയിലാണ്. ആര്‍.പി.എസ് മുഖേന കര്‍ഷകര്‍ നല്‍കുന്ന എ എക്‌സില്‍പെട്ട റബറിന് കിലോക്ക് 168 രൂപ വരെ ലഭിക്കും. നിലമ്പൂരില്‍ നിന്നും വിദേശ മാര്‍ക്കറ്റിലേക്ക് കര്‍ഷകരുടെ സഹായത്തോടെ റബര്‍ കയറ്റി അയക്കുന്നത് ആദ്യമായാണ്. റബര്‍ ബോര്‍ഡില്‍ നിന്നും എത്തിയ ഉദ്യോഗസ്ഥര്‍ ഗുണമേന്‍മ ഉറപ്പുവരുത്തിയ ശേഷമാണ് കയറ്റുമതിക്ക് അനുമതി നല്‍കിയത്.
തുഞ്ചത്ത് എഴുത്തച്ചന്‍ റബേഴ്‌സ് എം.ഡി കെ.രാജീവന്‍ ഫ്‌ളാഗ് ഓഫ് ചെയ്തു. കെ.സി അബ്ദുലാം അധ്യക്ഷനായി. ഡെപ്യൂട്ടി കമ്മിഷണര്‍ എ.വിജയന്‍, കമ്പനി ഡയറക്ടര്‍മാര്‍, കമ്പനി ഉദ്യോഗസ്ഥര്‍, കര്‍ഷകര്‍ തുടങ്ങിവര്‍ പങ്കെടുത്തു. ആദ്യ ലോഡ് ഒരാഴ്ചക്കുള്ളില്‍ ബ്രസീലിലെത്തും.