പത്തനംതിട്ട: പ്രതിഷ്ഠാദിനത്തിനും മിഥുനമാസ പൂജകള്‍ക്കുമായി ശബരിമല നട തുറന്നു. ഇന്നാണ് ശബരിമലയിലെ പ്രതിഷ്ഠാ ദിനം. ഇന്നലെ വൈകിട്ട് തന്ത്രി കണ്ഠര് മഹേഷ് മോഹനരുടെ സാന്നിധ്യത്തില്‍ മേല്‍ശാന്തി എസ്.ഇ. ശങ്കരന്‍ നമ്പൂതിരിയാണ് നട തുറന്നത്. ഇന്നലെ പ്രത്യേക പൂജകള്‍ ഒന്നും ഉണ്ടായിരുന്നില്ല.
    ഇന്നത്തെ പ്രതിഷ്ഠാദിന ചടങ്ങുകള്‍ക്ക് തന്ത്രിയും മേല്‍ശാന്തിയും കാര്‍മികത്വം നല്‍കും. മിഥുനമാസ പൂജകള്‍ നാളെ ആരംഭിക്കും. പതിവു പൂജകള്‍ക്ക് പുറമെ ഉദയാസ്തമന പൂജ, പടിപൂജ തുടങ്ങിയ ചടങ്ങുകളും നടക്കും. ശബരിമല മേല്‍ശാന്തി രചിച്ച തത്വമസി എന്ന പുസ്തകത്തിന്റെ പ്രകാശനം 18ന് രാവിലെ 10.30ന് നടക്കും.