ഇത്തവണ സമര സമിതിയിലെ പ്രധാനികളും നാട്ടുകാരും ചെറുത്തു നില്‍പില്‍ കാര്യമായി ഉണ്ടായിരുന്നില്ല എന്നതും അറസ്റ്റ് വരിക്കാന്‍ തയ്യാറായതും സമരസമതിയും ഉദ്യോഗസ്ഥരും തമ്മില്‍ ഒത്തു തീര്‍പ്പുണ്ടായെന്ന് തോന്നിപ്പിക്കുന്നരീതിയിലായിരുന്നു
കുന്നംകുളം: പെരുമ്പിലാവ് ജനവാസ മേഖലയിലൂടെ ഗൈല്‍ പൈപ്പ് ലൈന്‍ സ്ഥാപിക്കുന്നതിനെതിരെ വ്യാപക പ്രതിഷേധം. ഗൈല്‍ പൈപ്പ് ലൈന്‍ കൊണ്ടുപോകുന്നതിനായുള്ള പാത അളന്നു തിട്ടപെടുത്താനെത്തിയ ഉദ്യോഗസ്ഥരെ നാട്ടുകാര്‍ തടഞ്ഞു. തുടര്‍ന്ന് പൊലിസെത്തി പ്രതിഷേധക്കാരെ അറസ്റ്റ് ചെയ്ത് കൊണ്ടുപോയ ശേഷമാണ് നടപടികള്‍ ആരംഭിച്ചത്. പെരുമ്പിലാവില്‍ 58 വീടുകള്‍ സ്ഥിതി ചെയ്യുന്ന കണക്ക കോളനിയിലൂടെയാണ് പൈപ്പ് ലൈന്‍ കടന്നു പോകുന്നത്. ഇതിനെതിരെ പ്രതിഷേധം ശക്തമാവുകയും പരാതി നല്‍കുകയും ചെയ്തിരുന്നു. പിന്നീട് സമര സമിതി രൂപീകരിച്ച് ജില്ലാ ഭരണകൂടത്തിന് നല്‍കിയ പരാതിയിന്‍മേല്‍ തീര്‍പ്പുണ്ടാവുകയും പൈപ്പ് ലൈന് മറ്റൊരു ദിശയിലൂടെ കൊണ്ടു പോകുന്നതിനായി മാപ്പ് വരക്കുകയും ചെയ്തു. ഇത് പഞ്ചായത്ത് സെക്രട്ടറിക്ക് രേഖാമൂലം നല്‍കിയിരുന്നതുമാണ്. തീര്‍ത്തും ആള്‍ താമസമില്ലാത്ത ഈ മേഖലയില്‍ സ്വകാര്യ ക്രഷറുകാര്‍ക്ക് ബുദ്ധിമുട്ടുണ്ടാക്കുമെന്ന അവസ്ഥയിലാണ് ജനവാസ കേന്ദ്രങ്ങളിലൂടെ ലൈന്‍ കൊണ്ടുപോകുന്നതെന്നാണ് പ്രതിഷേധക്കാരുടെ ആരോപണം. റൂട്ട് നിശ്ചയിച്ച മേഖലയിലൂടെ തന്നെ പൈപ്പ് ലൈന്‍ കൊണ്ടുപോകണമെന്നാണ് സമരസമതിയുടെ ആവശ്യം. എന്നാല്‍ ഉദ്യോഗസ്ഥര്‍ ഇത് ഗൗനിച്ചില്ലെന്നും ജനവാസ മേഖലയിലൂടെ തന്നെ കൊണ്ടു പോകാനുള്ള നീക്കമാണെന്നും സമരക്കാര്‍ ആരോപിച്ചു. കഴിഞ്ഞ വര്‍ഷം ഇത്തരത്തില്‍ പൈപ്പ് സ്ഥാപിക്കാനെത്തിയപ്പോള്‍ സമര സമിതിയുടെ നേതൃത്വത്തില്‍ സ്ത്രീകളും കുട്ടികളുമടങ്ങുന്ന ജനാവലിയുടെ ചെറുത്തു നില്‍പിനുമുന്നില്‍ തളര്‍ന്ന് ഉദ്യോഗസ്ഥര്‍ മടങ്ങുകയായിരുന്നു. ഇത്തവണ സമര സമിതിയിലെ പ്രധാനികളും നാട്ടുകാരും ചെറുത്തു നില്‍പില്‍ കാര്യമായി ഉണ്ടായിരുന്നില്ല എന്നതും അറസ്റ്റ് വരിക്കാന്‍ തയ്യാറായതും സമരസമതിയും ഉദ്യോഗസ്ഥരും തമ്മില്‍ ഒത്തു തീര്‍പ്പുണ്ടായെന്ന് തോന്നിപ്പിക്കുന്നരീതിയിലായിരുന്നു. സമര സമതിയിലെ വെല്‍ഫെയര്‍ പാര്‍ട്ടി തൃശൂര്‍ ജില്ലാ കമ്മിറ്റി അംഗങ്ങളായ സി.എം ശരീഫ്, എം.എ കമറുദ്ദീന്‍, പഞ്ചായത്ത് കമ്മിറ്റി അംഗം സി.എം താഹ എന്നിവരെ കുന്നംകുളം പൊലിസ് അറസ്റ്റ് ചെയ്തു സ്റ്റേഷനിലേക്കു കൊണ്ടു പോയതോടെ ഉദ്യോഗസ്ഥര്‍ പ്രവര്‍ത്തി ആരംഭിച്ചു. ബുധനാഴ്ച രാവിലെ മുതല്‍ പൈപ്പ് സ്ഥാപിക്കല്‍ ആരംഭിക്കുമെന്നും മാര്‍ച്ച് 31 നകം ആദ്യഘട്ട പ്രവര്‍ത്തനം പൂര്‍ത്തിയാക്കുമെന്നും ഉദ്യോഗസ്ഥര്‍ അറിയിച്ചു. കുന്നംകുളം ഡി.വൈ.എസ്.പി പി വിശ്വംബരന്റെ നേതൃത്വത്തിലുള്ള പൊലിസ് സംഘമാണ് സമരക്കാരെ അറസ്റ്റ് ചെയ്ത് നീക്കിയത്.