വടക്കാഞ്ചേരി: വാഴാനി ഡാമില്‍ മത്സ്യബന്ധനത്തിനിടെ മധ്യവയസ്‌കനെ കാണാതായി. തെക്കുംകര വീരോലിപ്പാടം മീത്തിലാംകുന്നത്ത് പരമേശ്വരന്റെ മകന്‍ കുട്ടപ്പനെയാണ് (രാഘവന്‍ 59) കാണാതായത്. സുഹൃത്ത് ചിരിയങ്കണ്ടത്ത് വീട്ടില്‍ വിത്സനുമൊത്ത് ഡാമില്‍ എത്തിയതായിരുന്നു. വലയിടാന്‍ ഡാമിന്റെ കൈവഴിയ്ക്ക് കുറുകെ നീന്തുന്നതിനിടെ കുട്ടപ്പന്‍ താഴ്ന്ന് പോവുകയായിരുന്നു. വടക്കാഞ്ചേരി അഗ്നിശമന സേന, തൃശൂരില്‍ നിന്നുള്ള സ്‌കൂബ മുങ്ങല്‍ വിദഗ്ധരുടെ യൂനിറ്റ് എന്നിവര്‍ സംയുക്തമായി മണിക്കൂറുകള്‍ നീണ്ട തിരച്ചില്‍ നടത്തിയെങ്കിലും കണ്ടെത്താനായില്ല. ഇന്ന് തിരച്ചില്‍ തുടരും. തെക്കുംകര പഞ്ചായത്ത് മുന്‍ മെംബര്‍ രജിത ബിജോഷിന്റെ പിതാവാണ് കുട്ടപ്പന്‍.