കൊപ്പം: കുലുക്കല്ലൂര്‍ ഗ്രാമപഞ്ചായത്ത് പുതിയ പ്രസിഡന്റായി യു.ഡി.എഫിലെ സുലൈഖ ഉമ്മറിനെ തെരഞ്ഞടുത്തു. യു.ഡി.എഫ് പത്ത്, എല്‍.ഡി.എഫ് ആറ്, ബി.ജെ.പി ഒന്ന് എന്നിങ്ങനെയാണ് കക്ഷി നില. യു.ഡി.എഫിലെ പത്ത് മെമ്പര്‍മാരും എല്‍.ഡി.എഫിലെ ആറു പേരും ഇന്നലെ നടന്ന വോട്ടെടുപ്പില്‍ പങ്കെടുത്തപ്പോള്‍ ഏക ബി.ജെ.പി. അംഗം വിട്ടുനിന്നു.
പഞ്ചായത്തിലെ ഏഴാം വാര്‍ഡിലെ കോണ്‍ഗ്രസ് അംഗമാണ് സുലൈഖ ഉമ്മര്‍. യു.ഡി.എഫ് ഭരിക്കുന്ന പഞ്ചായത്തില്‍ പ്രസിഡന്റായിരുന്ന കോണ്‍ഗ്രസ് അംഗം എം.പി. മുഹമ്മദ് നൂറുദ്ദീന്‍ രാജിവെച്ച ഒഴിവിലേക്കാണ് പ്രസിഡന്റ് തെരഞ്ഞടുപ്പ് നടന്നത്.
പാര്‍ട്ടി ജില്ലാ നേതൃത്വത്തിന്റെ നിര്‍ദേശ പ്രകാരമായിരുന്നു നൂറുദീന്റെ രാജി. പാര്‍ട്ടിയുടെയും മുന്നണിയുടെയും നിര്‍ദേശങ്ങള്‍ അംഗീകരിക്കാതെ ഭരണം നടത്തിയിരുന്ന നൂറുദീനെതിരേ യു.ഡി.എഫ് മെമ്പര്‍ മാര്‍ അവിശ്വാസം കൊണ്ടുവന്നെങ്കിലും ക്വാറം തികയാത്തതിനാല്‍ പരാജയപ്പെട്ടു. ഇതിനെ തുടര്‍ന്ന് പാര്‍ട്ടിയും വിഭിന്ന ചേരിയായി.

പിന്നീട് എല്‍.ഡി.എഫ് നേതൃത്വത്തിലുള്ള സമരത്തില്‍ നൂറുീറദ്ദീന്‍ പങ്കെടുത്തത് പ്രശ്‌നം കൂടുതല്‍ സങ്കീര്‍ണമാക്കിയിരുന്നു. ഇതേ തുടര്‍ന്ന് നൂറുദ്ദീനെ പാര്‍ട്ടിയില്‍ നിന്ന് പുറത്താക്കാന്‍ മണ്ഡലം പ്രസിഡന്റ് നേതൃത്വത്തോട് ആവശ്യപ്പെടുക വരെയെത്തി. പുതിയ പ്രസിഡന്റ് തെരഞ്ഞടുപ്പില്‍ കാര്യങ്ങള്‍ പിടിവിട്ടു പോകുമോ എന്ന് പാര്‍ട്ടി ഭയപ്പെട്ടിരുന്നെങ്കിലും പ്രശ്‌നങ്ങളൊന്നുമുണ്ടായില്ല.
കുടിവെള്ള പ്രശ്‌നത്തിന് മുന്‍തൂക്കം നല്‍കിക്കൊണ്ടുള്ള പ്രവര്‍ത്തനങ്ങള്‍ക്കാണ് താന്‍ തുടക്കം കുറിക്കാനുദ്ദേശിക്കുന്നതെന്ന് പുതിയ പ്രസിഡന്റ് മാധ്യമപ്രവര്‍ത്തകരോട് പറഞ്ഞു.