ചാലക്കുടി: മേലൂരില്‍ വീട്ടുമുറ്റത്ത് യുവാവിനെ വെട്ടേറ്റ നിലയില്‍ കണ്ടെത്തി. കോടാലി മുരിക്കിങ്ങല്‍ വെട്ടിയാട്ടില്‍ ശിവദാസ്(45)നെയാണ് ദേഹമാസകലം വെട്ടേറ്റ നിലയില്‍ ഇന്നലെ പുലര്‍ച്ചെ 2.30ഓടെ കണ്ടത്. മേലൂര്‍ കുന്നപ്പിള്ളി തച്ചുകണ്ടത്തില്‍ രാജപ്പന്റെ വീടിന് മുന്നിലാണ് ശിവദാസിനെ അവശനായ നിലയില്‍ കണ്ടത്.
രാജപ്പന്റെ മകളുടെ ഭര്‍ത്താവാണ് ശിവദാസ്. കഴിഞ്ഞ ആറുവര്‍ഷമായി രാജപ്പന്റെ മകളും ശിവദാസും വേര്‍പിരിഞ്ഞാണ് താമസം. വിവാഹബന്ധം വേര്‍പ്പെടുത്തുന്നതിനായുള്ള കേസും നടക്കുന്നുണ്ട്. ഇതിന് മുന്‍പും ശിവദാസ് രാജപ്പന്റെ വീട് അക്രമിച്ച സംഭവവും ഉണ്ടായിട്ടുണ്ട്. പൊലിസെത്തിയാണ് ശിവദാസിനെ ആശുപത്രിയിലെത്തിച്ചത്.