സ്വന്തം ലേഖകന്‍
റിയാദ്: സഊദിയില്‍ നിന്ന് ജോലി നഷ്ടപ്പെട്ട് മടങ്ങുന്ന ഇന്ത്യക്കാരുടെ എണ്ണം കുത്തനെ ഉയരുന്നതായി കണക്കുകള്‍. ഇന്ത്യന്‍ വിദേശകാര്യ മന്ത്രാലയം പുറത്തുവിട്ട കണക്കുകളിലാണ് ഇക്കാര്യം വ്യക്തമാക്കുന്നത്. മൂന്നുവര്‍ഷത്തിനിടെ സഊദിയില്‍ നിന്ന് തിരിച്ചെത്തിയത് ഏഴു ലക്ഷത്തോളം ഇന്ത്യക്കാരാണ്. 2017 മാര്‍ച്ചില്‍ 30,39,000 ഇന്ത്യക്കാര്‍ സഊദിയിലുണ്ടായിരുന്നതായാണ് കണക്കുകള്‍.
അതേവര്‍ഷം സെപ്റ്റംബറില്‍ അത് 32,53,901 ആയി ഉയര്‍ന്നു. എന്നാല്‍, പിന്നീട് ഓരോ വര്‍ഷവും ഇന്ത്യക്കാരുടെ എണ്ണത്തില്‍ ഗണ്യമായ കുറവാണ് രേഖപ്പെടുത്തിയത്. സഊദി നടപ്പാക്കിവരുന്ന സഊദിവല്‍ക്കരണ പദ്ധതികള്‍ ഇന്ത്യക്കാര്‍ക്ക് വ്യാപകമായി തൊഴില്‍ നഷ്ടപ്പെടുത്തുകയാണ്.