തിരുവനന്തപുരം: ആധാരങ്ങളില്‍ വിലകുറച്ചു കാണിച്ചതിനെ തുടര്‍ന്ന് സ്വീകരിച്ച അണ്ടര്‍ വാല്യുവേഷന്‍ നടപടികള്‍ നിര്‍ത്തിവയ്ക്കാനാവില്ലെന്ന് മന്ത്രി ജി.സുധാകരന്‍. 

ഇതു സര്‍ക്കാര്‍ തീരുമാനമല്ല, നിയമപരമായ നടപടിയാണ്. ആധാരത്തിലെ പ്രതിഫലം ശരിയായി രേഖപ്പെടുത്തിയില്ലെന്ന് രജിസ്റ്ററിങ് ഉദ്യോഗസ്ഥനു വിശ്വസിക്കാന്‍ കാരണമുണ്ടെങ്കില്‍ ശരിയായ വിലനിര്‍ണയത്തിനായി കലക്ടര്‍ക്കു കൈമാറാം. ജില്ലാ രജിസ്ട്രാര്‍ വില നിര്‍ണയിച്ച ശേഷം കുറവ് മുദ്രവില അടയ്ക്കാന്‍ നോട്ടിസ് നല്‍കും. ഇതനുസരിച്ച് നേരത്തെ നോട്ടിസ് നല്‍കിയിട്ടും ഇതുവരെ പണമടയ്ക്കാത്തവര്‍ക്കാണ് ഇപ്പോള്‍ വീണ്ടും നോട്ടിസ് നല്‍കുന്നത്. ഇതിന് ആക്ടിലോ ചട്ടങ്ങളിലോ തടസമില്ല. അതുകൊണ്ടുതന്നെ കുടിശ്ശികയുള്ള എല്ലാ അണ്ടര്‍ വാല്യുവേഷന്‍ കേസുകളിലും പണം അടയ്ക്കണമെന്നാവശ്യപ്പെട്ട് നോട്ടിസ് നല്‍കുന്നതിന് രജിസ്‌ട്രേഷന്‍ വകുപ്പിലെ ഉദ്യോഗസ്ഥര്‍ക്ക് അധികാരമുണ്ടെന്നും എം. ഉമ്മറിന്റെ സബ്മിഷനു മറുപടിയായി മന്ത്രി നിയമസഭയെ അറിയിച്ചു.