ഹൈദരാബാദ്: തമിഴ്‌നാട് മുഖ്യമന്ത്രി ജയലളിതയ്ക്കും ബോളിവുഡ് നടന്‍ സല്‍മാന്‍ഖാനും കോടതി ജാമ്യം നല്‍കിയതു ജുഡീഷ്യറിയെ മോശമായി ചിത്രീകരിക്കാന്‍ ഇടയാക്കിയതായി മുന്‍ സുപ്രിം കോടതി ജഡ്ജ് എന്‍. സന്തോഷ് ഹെഗ്‌ഡെ.
ഇരുവര്‍ക്കുമെതിരായ കേസില്‍ സ്വീകരിച്ച കോടതി നിലപാട് തെറ്റായ സന്ദേശമാണ് നല്‍കുന്നത്. അധികാരവും സമ്പത്തുമുള്ളവര്‍ക്ക് ഏത് കേസിലും പെട്ടെന്നു ജാമ്യം കിട്ടുമെന്ന സന്ദേശമാണ് നല്‍കുന്നത്.  നിയമത്തിന്റെ കെട്ടുപാടുകളില്‍ നിന്ന്  സ്വാധീനമുള്ളവര്‍ക്ക് രക്ഷപ്പെടാന്‍ ഒരു പ്രയാസവുമില്ലെന്നും മുന്‍കര്‍ണാടക ലോകായുക്തകൂടിയായ ഹെഗ്‌ഡെ പറഞ്ഞു.
അനധികൃത സ്വത്ത് സമ്പാദന കേസിലാണ്  തമിഴ്‌നാട് മുഖ്യന്ത്രി ജയലളിതക്കെതിരേ കേസെടുത്തത്.  14 വര്‍ഷം മുന്‍പ് നടന്ന അഴിമതിക്കേസില്‍ കര്‍ണാടക ഹൈക്കോടതിയാണ്  അവരുടെ ജാമ്യം റദ്ദാക്കിയത്. തുടര്‍ന്ന് സുപ്രിം കോടതിയെ സമീപിച്ചാണു ജാമ്യം നേടിയത്.  
സല്‍മാന്‍ ഖാന്‍ ഹൈക്കോടതിയില്‍ ജാമ്യഹരജി നല്‍കിയപ്പോള്‍ ഒരു മണിക്കൂറിനകമാണ് അദ്ദേഹത്തിന് ജാമ്യം നല്‍കിയത്. രണ്ടുപേരുടേയും കാര്യത്തിലുണ്ടായ കോടതി നടപടികളെ വ്യക്തിപരമായി അനുകൂലിക്കുന്നില്ലെന്നും ഹെഗ്‌ഡെ വ്യക്തമാക്കി.