കോഴിക്കോട്: കോഴിക്കോടിന്റെ മാറ്റത്തിന് ജനകീയ മുഖം നല്‍കിയ എം.കെ രാഘവന്‍ എം.പിക്ക് കോഴിക്കോട് പൗരാവലി സ്വീകരണം നല്‍കുന്നു. 22ന് വൈകീട്ട് അളകാപുരി ഓഡിറ്റോറിയത്തിലാണ് പരിപാടി.
കോഴിക്കോടിന്റെ പുരോഗതിയില്‍ അദ്ദേഹം വഹിച്ച പങ്ക്, പാര്‍ലമെന്റിലെ ഇടപെടലുകള്‍, ലാളിത്യപൂര്‍ണമായ ജീവിതം, ആത്മബന്ധങ്ങള്‍ തുടങ്ങിയ സവിശേഷതകള്‍ മുന്‍നിര്‍ത്തിയാണ് അദ്ദേഹത്തെ ആദരിക്കുന്നതെന്ന് സംഘാടക സമിതി വാര്‍ത്താസമ്മേളനത്തില്‍ അറിയിച്ചു. സ്വീകരണ പരിപാടി ഡി. ബാബുപോള്‍ ഉദ്ഘാടനം ചെയ്യും. ഷെവലിയര്‍ സി.ഇ ചാക്കുണ്ണി അധ്യക്ഷനാകും. കോഴിക്കോട് ബിഷപ്പ് ഡോ. വര്‍ഗീസ് ചക്കാലക്കല്‍ പൊന്നാട അണിയിക്കും. വലിയ ഖാസി കെ.വി ഇമ്പിച്ചമ്മദ് ഹാജി ഉപഹാരം സമര്‍പ്പിക്കും.
ആചാര്യ എം.ആര്‍ രാജേഷ് മംഗള പത്രം നല്‍കും. ഡോ.എം.ജി.എസ് നാരായണന്‍ മുഖ്യ പ്രഭാഷണം നടത്തും. വാര്‍ത്താസമ്മേളനത്തില്‍ സി.ഇ ചാക്കുണ്ണി, വിവേക് ഡി ഷേണായി, ഗുലാംഹുസൈന്‍ കൊളക്കാടന്‍, എം .വി മാധവന്‍ പങ്കെടുത്തു.