മലപ്പുറം: കേരളാ വഖ്ഫ് ട്രൈബ്യൂണല്‍ ജഡ്ജിമാരെ നിയമിക്കുന്നതില്‍ സമസ്തയ്ക്കുണ്ടായ ആശങ്ക പരിഹരിക്കുമെന്ന് മന്ത്രി കെ.ടി ജലീലിന്റെ ഉറപ്പ്. ഫെബ്രുവരി 28ന് മുന്‍പ് ഇക്കാര്യത്തില്‍ പരിഹാരമുണ്ടാക്കുമെന്ന് മന്ത്രി സമസ്ത നേതാക്കളുമായി നടത്തിയ ചര്‍ച്ചയില്‍ പറഞ്ഞു.

ഇതേത്തുടര്‍ന്ന് ശനിയാഴ്ച കോഴിക്കോട്ട് സമസ്തയുടെ കീഴിലുള്ള മഹല്ലുകളുടെ മുതവല്ലിമാര്‍ നടത്താനിരുന്ന ധര്‍ണ സമരം മാറ്റിവച്ചു.

ഇന്ന ആളാവണം എന്ന് സമസ്ത പറഞ്ഞിട്ടില്ല. നിഷ്പക്ഷമായി നില്‍ക്കുന്ന ഒരാളാവണമെന്ന നിര്‍ദേശമാണ് സമസ്ത മുന്നോട്ടുവച്ചത്. അത് തീര്‍ച്ചയായും സര്‍ക്കാര്‍ പരിഹരിക്കുമെന്നും കെ.ടി ജലീല്‍ പറഞ്ഞു. നിലവിലുള്ള ഒരാളെ മാറ്റിക്കൊണ്ടായിരിക്കും ഇതിനു പരിഹാരം കാണുകയെന്നും അദ്ദേഹം പറഞ്ഞു.

കോടതിയുടെ ഇടപെടല്‍ മൂലം ശരീഅത്ത് റൂള്‍ സര്‍ക്കാര്‍ ഉണ്ടാക്കി വിജ്ഞാപനം ചെയ്തതിലെ പിശകിലും പരിഹാരമുണ്ടാകുമെന്ന് മന്ത്രി പറഞ്ഞു. അതില്‍ ചില പിശകുകളുണ്ടെന്ന് മുസ്‌ലിം സംഘടനകള്‍ ചൂണ്ടിക്കാണിച്ചിട്ടുണ്ടെന്നും സമസ്തയുടെ അഭിപ്രായവും കേട്ടുവെന്നും ജലീല്‍ പറഞ്ഞു. ഇക്കാര്യത്തിലും ഇടപെട്ട് പരിഹാരമുണ്ടാവുമെന്ന് ജലീല്‍ ഉറപ്പുനല്‍കി.