മിലാന്‍: ഇറ്റാലിയന്‍ കപ്പിലെ ആദ്യ പാദ സെമിയിലെ സൂപ്പര്‍ പോരാട്ടത്തില്‍ നാപ്പോളിയെ ഒന്നിനെതിരേ മൂന്നു ഗോളുകള്‍ക്ക് യുവന്റസ് തകര്‍ത്തു. ഒരു ഗോളിന് പിന്നിട്ട് നിന്ന ശേഷമായിരുന്നു യുവന്റസിന്റെ ജയം. പൗലോ ഡൈബാല യുവന്റസിനായി ഇരട്ട ഗോള്‍ നേടി. ശേഷിച്ച ഗോള്‍ ഗോണ്‍സാലോ ഹിഗ്വയിന്‍ സ്വന്തമാക്കി. 

മത്സരത്തിനിറങ്ങും മുമ്പ് നാപ്പോളിക്കായിരുന്നു മുന്‍തൂക്കം. സീരി എയില്‍ ടീം നടത്തുന്ന മികച്ച പ്രകടനമായിരുന്നു അവരെ മുന്നില്‍ നിര്‍ത്തിയത്. ആദ്യ പകുതിയിലും പ്രകടനം കൊണ്ട് മികച്ചു നില്‍ക്കാന്‍ നാപ്പോളിക്ക് സാധിച്ചു. മിലിക്കിന്റെ തകര്‍പ്പന്‍ മുന്നേറ്റങ്ങള്‍ യുവന്റസിനെ പ്രതിരോധത്തിലാക്കി. ഗോളെന്നുറച്ച താരത്തിന്റെ ഷോട്ട് ജോര്‍ജിയോ കെല്ലിനി തടയുകയായിരുന്നു. മറുഭാഗത്ത് അവസരം ഒരുക്കുന്നതില്‍ യുവന്റസ് കഷ്ടപ്പെട്ടു. ഡൈബാലയുടെ മികച്ചൊരു ഷോട്ട് പെപ്പെ റെയ്‌ന സേവ് ചെയ്തു.
പതിയെ യുവന്റസ് മത്സരത്തിലേക്ക് തിരിച്ചെത്തി. ഇതോടെ ഇരുവരും ആക്രമണ ഫുട്‌ബോളാണ് കാഴ്ച്ചവച്ചത്. തന്റെ പഴയ ടീമിനെതിരേ ആദ്യ ഘട്ടത്തില്‍ മിന്നല്‍ പ്രകടനം നടത്താന്‍ സാധിക്കാതിരുന്ന ഹിഗ്വയ്‌നാണ് കൂടുതല്‍ അപകടകാരിയായത്. പെനാല്‍ട്ടി ബോക്‌സിനുള്ളില്‍ നിന്ന് താരം തൊടുത്തൊരു ഷോട്ട് നിര്‍ഭാഗ്യം കൊണ്ട് പുറത്തേക്ക് പോവുകയായിരുന്നു. ഇതിന് പിന്നാലെയാണ് നാപ്പോളി അക്കൗണ്ട് തുറന്നത്. ഇന്‍സാഗ്നിയും മിലിക്കും ചേര്‍ന്ന് നടത്തിയ മുന്നേറ്റത്തില്‍ പന്ത് ലഭിച്ച കലേജോണ്‍ ഗോള്‍ നേടുകയായിരുന്നു.
ആദ്യ പകുതി അവസാനിക്കാനിരിക്കെ യുവന്റസ് സമനില നേടേണ്ടതായിരുന്നു. എന്നാല്‍ മരിയ മാന്‍സുക്കിച്ചിന്റെ മികച്ചൊരു വോലി റെയ്‌ന തടുത്തിട്ടു. റീബൗണ്ടില്‍ സ്റ്റീഫന്‍ ലിച്ചന്‍സ്റ്റെയ്‌നറുടെ ശ്രമവും റെയ്‌ന വിഫലമാക്കി. രണ്ടാം പകുതിയില്‍ നാപ്പോളിക്ക് തുടര്‍ച്ചയായി തിരിച്ചടി നേരിട്ടു. 47ാം മിനുട്ടില്‍ ഡൈബാലയിലൂടെ യുവന്റസ് സമനില നേടി. കോലിബാലി വീഴ്ത്തിയതിന് ലഭിച്ച പെനാല്‍റ്റി ലക്ഷ്യത്തിലെത്തിക്കുകയായിരുന്നു ഡൈബാല. 64ാം മിനുട്ടില്‍ ഹിഗ്വയിന്റെ ഗോളോടെ നാപ്പോളി ലീഡെടുത്തു. അഞ്ചു മിനുട്ടുകള്‍ക്ക് ശേഷം വീണ്ടുമൊരു പെനാല്‍റ്റി ലക്ഷ്യത്തിലെത്തിച്ച് ഡൈബാല ടീമിന്റെ വിജയ നായകനാവുകയായിരുന്നു.