അബൂദബി: ഏഷ്യന്‍ കപ്പ് ഫുട്‌ബോള്‍ പ്രീക്വാര്‍ട്ടര്‍ മത്സരങ്ങള്‍ക്ക് നാളെ തുടക്കമാവും. ആദ്യ റൗണ്ട് പൂര്‍ത്തിയായപ്പോള്‍ പ്രീക്വാര്‍ട്ടര്‍ പ്രതീക്ഷയുണ്ടായിരുന്ന ടീമുകള്‍ തന്നെയാണ് ജയിച്ചു കയറിയത്. ഏറ്റവും മികച്ച മൂന്നാം സ്ഥാനക്കാരായി എ ഗ്രൂപ്പില്‍നിന്ന് ബഹറൈനും ഡി ഗ്രൂപ്പില്‍ നിന്ന് വിയറ്റ്‌നാമും പ്രീക്വാര്‍ട്ടറിലേക്ക് യോഗ്യത നേടിയിട്ടുണ്ട്. ഗ്രൂപ്പിലെ മൂന്നാം മത്സരത്തില്‍ പ്രീക്വാര്‍ട്ടര്‍ പ്രതീക്ഷയില്‍ ഇന്ത്യ ഇറങ്ങിയെങ്കിലും ബഹ്‌റൈനു മുന്നില്‍ നിര്‍ഭാഗ്യം കൊണ്ട് പരാജയപ്പെടുകയായിരുന്നു. സമനില പിടിക്കുകയാണെങ്കില്‍ ഒരു പക്ഷെ ഇന്ത്യക്ക് ക്വാര്‍ട്ടറില്‍ പ്രവേശിക്കാമായിരുന്നു.
പ്രീക്വാര്‍ട്ടറില്‍ ജപ്പാനും സഊദിയും തമ്മിലുള്ള മത്സരമാണ് സൂപ്പര്‍ പോരാട്ടമായി കണക്കാക്കുന്നത്. ഏഷ്യയില്‍നിന്ന് ലോകകപ്പ് കളിച്ച രണ്ട് ടീമുകളിലൊന്ന് ഇതോടെ ടൂര്‍ണമെന്റില്‍നിന്ന് പുറത്താകുമെന്നുറപ്പായി. കഴിഞ്ഞ വര്‍ഷത്തെ ചാംപ്യന്മാരായ ആസ്‌ത്രേലിയക്ക് ഉസ്ബക്കിസ്താനാണ് എതിരാളികള്‍. മറ്റൊരു മത്സരത്തില്‍ ഇറാനും ഒമാനും തമ്മില്‍ ഏറ്റുമുട്ടും. മൂന്നാം സ്ഥാനക്കാരായി കയറിയ വിയറ്റ്‌നാമിന് ജോര്‍ദാനാണ് എതിരാളികള്‍. ഏഷ്യന്‍ കരുത്തരായ ചൈന തായ്‌ലന്‍ഡിനെ നേരിടും. ഇന്ത്യയെ പരാജയപ്പെടുത്തിയ യു.എ.ഇ കിര്‍ഗിസ്താനെ നേരിടും.

ദക്ഷിണ കൊറിയക്ക് എ ഗ്രൂപ്പില്‍ നിന്ന് മൂന്നാം സ്ഥാനക്കാരായി കടന്നു കൂടിയ ബഹ്‌റൈനാണ് എതിരാളികള്‍. അടുത്ത ലോകകപ്പിന് ഒരുങ്ങുന്ന ഖത്തറിന് ഇറാഖാണ് എതിരാളികള്‍. കളിച്ച മൂന്ന് മത്സരങ്ങളിലും തോല്‍വി അറിയാത്ത ഖത്തര്‍ മികച്ച ഫോമിലാണ്.