കൊണ്ടോട്ടി: കരിപ്പൂരില്‍ റണ്‍വേ റീകാര്‍പ്പറ്റിങ് പൂര്‍ത്തിയാക്കി പൂര്‍ണമായും വിമാനങ്ങള്‍ക്കായി തുറന്നു കൊടുത്തു. ഇതോടെ പകല്‍ 12 മുതല്‍ രാത്രി എട്ട് വരെ വിമാനങ്ങള്‍ക്ക് റണ്‍വേയില്‍ എത്തുന്നതിനുളള നിയന്ത്രണം നീങ്ങി.18 മാസങ്ങള്‍ക്ക് ശേഷമാണ് നവീകരണം കഴിഞ്ഞ് പൂര്‍ണമായും വിമാനങ്ങള്‍ക്കായി റണ്‍വേ തുറന്നത്.
നിയന്ത്രണം നീക്കിയതോടെ ചെന്നൈയിലേക്ക് ഇന്‍ഡിഗോ പുതിയ സര്‍വിസ് തുടങ്ങി.ഉച്ചക്ക് 12.45ന് ചെന്നൈയില്‍ നിന്ന് പുറപ്പെടുന്ന വിമാനം 1.45ന് കരിപ്പൂരിലെത്തി. ഈ വിമാനം 2.15ന് പുറപ്പെട്ട് 3.15ന് ചെന്നൈയിലെത്തി. വിമാനത്താവളത്തിന്റെ പ്രവര്‍ത്തനം 24 മണിക്കൂര്‍ ആക്കിയതിനാല്‍ വേനല്‍ക്കാല ഷെഡ്യൂള്‍ ഏപ്രില്‍ മുതല്‍ പകലിലേക്കും ക്രമീകരിക്കും.
കരിപ്പൂരില്‍ നിന്ന് ഇന്‍ഡിഗോക്ക് പുറകെ എയര്‍ ഇന്ത്യ, എയര്‍ ഇന്ത്യ എക്‌സ്പ്രസ്, ജെറ്റ് എയര്‍വേയ്‌സ്, സ്‌പൈയ്‌സ് ജെറ്റ്, എയര്‍ കാരവല്‍ തുടങ്ങിയ കമ്പനികള്‍ സര്‍വിസ് അനുമതിക്കായി കാത്തിരിക്കുകയാണ്.