മെല്‍ബണ്‍: ആസ്‌ത്രേലിയയില്‍ ഇസ്‌റാഈല്‍ വിദ്യാര്‍ഥി കൊല്ലപ്പെട്ട സംഭവത്തില്‍ യുവാവ് അറസ്റ്റില്‍. മെല്‍ബണിലെ ലാ ട്രോബ് സര്‍വകലാശാലയില്‍ വിദ്യാര്‍ഥിയായ ഐയ്യ മാസര്‍വേയുടെ വധത്തിലാണ് 20കാരന്‍ പിടിയിലായത്. നഗരാതിര്‍ത്തിയില്‍നിന്നാണ് ഇയാളെ പൊലിസ് വലയിലാക്കിയത്.

കഴിഞ്ഞ ദിവസം ഒരു കോമഡി ഷോ പരിപാടിയില്‍ പങ്കെടുത്തു മടങ്ങവെയാണ് കേസിനാസ്പദമായ സംഭവം നടന്നത്. സഹോദരിയുമായി ഫോണില്‍ സംസാരിച്ചുകൊണ്ടിരിക്കെ മാസര്‍വേയെ അജ്ഞാതന്‍ പിന്നില്‍നിന്ന് ആക്രമിക്കുകയായിരുന്നു. ലാ ട്രോബ് സര്‍വകലാശാലയ്ക്കടുത്തുനിന്നാണു യുവതിയുടെ മൃതദേഹം കണ്ടെത്തിയത്. അറസ്റ്റിലായയാളുടെ വിശദവിവരങ്ങള്‍ പൊലിസ് പുറത്തുവിട്ടിട്ടില്ല. അതേസമയം ഇയാളെ പിടികൂടാന്‍ സഹായിച്ച നാട്ടുകാര്‍ക്ക് വിക്ടോറിയ പൊലിസ് നന്ദി രേഖപ്പെടുത്തി. മാസര്‍വേയെ ലൈംഗികമായി ആക്രമിച്ചിരിക്കാനുള്ള സാധ്യത പൊലിസ് തള്ളിക്കളയുന്നില്ല.