ദീപക്കിനെയും പ്രഭുവിനെയും കയറ്റാതിരുന്നത് ബോട്ടില്‍ ആളധികമായതിനാല്‍
കൊടുങ്ങല്ലൂര്‍: മനുഷ്യക്കടത്ത് അന്വേഷണത്തില്‍ പൊലിസിന് തുമ്പായി ബോട്ടില്‍ നിന്ന് അവസാന നിമിഷം ഒഴിവാക്കപ്പെട്ട ശ്രീലങ്കന്‍ വംശജരായ ദീപക്കും പ്രഭുവും. കൊടുങ്ങല്ലൂര്‍ സര്‍ക്കിള്‍ ഇന്‍സ്‌പെക്ടര്‍ പി.കെ പത്മരാജന്റെ നേതൃത്വത്തിലുള്ള അന്വേഷണ സംഘം കണ്ടെത്തിയ ഇരുവരില്‍ നിന്നും എറണാകുളം അഡ്മിനിസ്‌ട്രേഷന്‍ ഡിവൈ.എസ്.പി സോജന്‍ മൊഴിയെടുത്തു.
കൈയകലത്ത് നിന്നും ദീപക്കിന് നഷ്ടമായത് കുടിയേറ്റ സ്വപ്നം മാത്രമല്ല, സ്വന്തം കുടുംബം കൂടിയാണ്.ന്യൂസിലന്‍ഡിലേക്ക് പോകാനായി ഏജന്റ് മുഖേന ഡല്‍ഹിയില്‍ നിന്നും മുനമ്പത്തെത്തിയ ദീപക് ഉള്‍പ്പെടെയുള്ളവര്‍ ബോട്ട് പുറപ്പെടുന്ന നിമിഷത്തില്‍ പുറന്തള്ളപ്പെടുകയായിരുന്നു. ആളധികമാണെന്ന കാരണത്താല്‍ ദീപക്, പ്രഭു എന്നിവര്‍ ഉള്‍പ്പെടെയുള്ള ഇരുപതോളം പേരെ പുറത്താക്കി ബോട്ട് യാത്ര തിരിച്ചു. പ്രഭുവിനെ ബോട്ടില്‍ നിന്നും ചവിട്ടി വീഴ്ത്തുകയായിരുന്നു. എന്നാല്‍ ദീപകിന്റെ ഭാര്യയും പറക്കമുറ്റാത്ത കുഞ്ഞും ബോട്ടിലകപ്പെടുകയും ചെയ്തു.
ശ്രീലങ്കന്‍ തമിഴര്‍ താമസിക്കുന്ന ഡല്‍ഹിയിലെ മദഗിരി അംബേദ്കര്‍ കോളനിയില്‍ നിന്നും ദീപകും കുടുംബവുമുള്‍പ്പെടെ നൂറോളം പേരാണ് രവീന്ദ്രന്‍ എന്ന ഏജന്റ് മുഖേന മുനമ്പത്ത് എത്തിയത്. മുതിര്‍ന്നവര്‍ക്ക് ഒന്നര ലക്ഷം രൂപയായിരുന്നു യാത്രാ നിരക്ക്. കുട്ടികള്‍ക്ക് യാത്ര സൗജന്യവും.
ബോട്ടിന്റെ ശേഷിയേക്കാള്‍ കൂടുതല്‍ ഭാരമാകാതിരിക്കാനാണ് ഏജന്റുമാര്‍ ഏതാനും പേരെ ഒഴിവാക്കിയത്. ഇതേ കാരണത്താലാണ് കുറെ ബാഗുകള്‍ കൊടുങ്ങല്ലൂരില്‍ ഉപേക്ഷിക്കുകയും ചെയ്തത്. ഡല്‍ഹിയില്‍ നിന്നും എത്തിയ നൂറംഗ സംഘം ഗുരുവായൂരില്‍ ലോഡ്ജുകളില്‍ താമസിച്ചിരുന്നു. ഇവിടെ നിന്നാണ് സംഘം ചോറ്റാനിക്കരയിലേക്ക് പോയത്. മദഗിരി കോളനിയില്‍ താമസിക്കുന്ന രവീന്ദ്രനാണ് കോളനിവാസികളെ രാജ്യം വിടാന്‍ പ്രേരിപ്പിച്ചത്. പ്രധാന ഏജന്റായ ശ്രീകാന്തും ഒപ്പം രവീന്ദ്രനും ബോട്ടില്‍ പോയവരിലുള്‍പ്പെടുന്നുണ്ട്. മറ്റൊരു ഏജന്റായ ശെല്‍വന്‍ ഇന്ത്യയില്‍ തന്നെയുണ്ടെന്നാണ് നിഗമനം.
താമസിക്കാന്‍ വീടും പ്രതിമാസം മൂന്ന് ലക്ഷം രൂപ ശമ്പളവുമായിരുന്നു കുടിയേറ്റക്കാര്‍ക്ക് വാഗ്ദാനം. ഈ മോഹന വാഗ്ദാനം വിശ്വസിച്ചാണ് 47 ദിവസത്തെ കടല്‍യാത്രയ്ക്ക് 230തിലധികം പേര്‍ ഇറങ്ങിപ്പുറപ്പെട്ടത്.