റിയാദ്: രാജ്യതലസ്ഥാനത്തെ കെജരീവാള്‍ തരംഗം കേവലം ഡല്‍ഹിയിലൊതുങ്ങുന്നതല്ലെന്നും ഇന്ത്യന്‍ ജനതയുടെ മൊത്തം വികാരമുള്‍ക്കൊള്ളുന്ന വിജയമാണിതെന്നും ആം ആദ്മി വെല്‍ഫെയര്‍ അസോസിയേഷന്‍ സൗദി അറേബ്യ ( ആവാസ് ) പ്രതിനിധികൾ റിയാദില്‍ നടത്തിയ വാര്‍ത്താസമ്മേളനത്തില്‍ പറഞ്ഞു.  ജനക്ഷേമത്തിലൂന്നിയ ബദൽ രാഷ്ട്രീയമാണ് ആം ആദ്മി പാർട്ടി മുന്നോട്ട് വെക്കുന്നത്. പൗരത്വ ബില്ലടക്കമുള്ള വിഷയങ്ങളില്‍ രാജ്യം കടുത്ത നിരാശയിലൂടെ കടന്ന് പോകുമ്പോള്‍ ഭാരതീയമനസ്സ് വര്‍ഗീയതക്ക് കീഴ്പെടില്ലെന്നും 'വികസനം വാഴും,  വര്‍ഗീയത വീഴുമെ'ന്ന  സന്ദേശമാണ് കെജരീവാള്‍ ഡല്‍ഹിയില്‍ നല്‍കുന്നത്. വെള്ളിയാഴ്ച റിയാദിലെ ബത്തയില്‍ വിക്ടറി ഡേ കൊണ്ടാടുമെന്നും  പ്രതിനിധികൾ അറിയിച്ചു.  വാര്‍ത്താസമ്മേളനത്തില്‍ കണ്‍വീനര്‍ അസീസ് മാവൂര്‍, സെക്രട്ടറി ഇല്ല്യാസ് പാണ്ടിക്കാട്, ഫൗണ്ടർ അസീസ് കടലുണ്ടി, മുൻ കൺവീനർ  മന്‍സൂര്‍ വേങ്ങര, ജോയിന്റ് കൺവീനർ പോള്‍ വര്‍ഗീസ്, ട്രഷറർ അരുൺ റാം, ഐ ടി കോഓർഡിനേറ്റർ ശിഹാബ് അരീക്കാട്, ടി കെ സി അഷ്റഫ്  പങ്കെടുത്തു.

റിയാദിലും ജിദ്ദയിലും ദമ്മാമിലും കടകള്‍, പൊതു നിരത്തുകള്‍, ഹോസ്പിറ്റലുകളിലടക്കം ലഡു, മിഠായി വിതരണം നടത്തി ദില്ലിയിലെ വിജയം ആവാസ് പ്രവർത്തകർ ആഘോഷിച്ചു.  ആഘോഷ പരിപാടികള്‍ക്ക് മജീദ് തിരൂര്‍, ജലീല്‍ വള്ളിക്കുന്ന്, ഷബീര്‍ കൊടക്കാട്, രവി റഫി, ഷരീഫ്ഷ, ഹംസ പൂക്കാട്ടിൽ എന്നിവർ നേത്യത്വം നല്‍കി.