മട്ടാഞ്ചേരി: ഫോര്‍ട്ട്‌കൊച്ചി മാന്ത്രയില്‍ റോഡരികില്‍ പാര്‍ക്കു ചെയ്തിരുന്ന രണ്ടു കാറുകള്‍ സാമൂഹ്യ വിരുദ്ധര്‍ നശിപ്പിച്ചു. മാന്ത്ര ആദര്‍ശ് ട്യൂഷന്‍ സെന്ററിനു സമീപം കുരിശിങ്കല്‍ ജോസി, അയല്‍വാസി അജിത്ത് എന്നിവരുടെ കാറുകളാണു നശിപ്പിക്കപ്പെട്ടത് ഇന്നലെ രാത്രിയിലാണു സംഭവമെന്നു കരുതുന്നു.
ജോസിയുടെ കാറിന്റെ ചില്ലുകള്‍ തകര്‍ക്കുകയും സീറ്റില്‍ കാപ്പി പൊടി വിതറുകയും ചെയ്തിട്ടുണ്ട്. അജിത്തിന്റെ നാനോ കാറിന്റെ ചില്ല് തകര്‍ക്കുകയും സ്റ്റിയറിംഗ് നശിപ്പിക്കുകയും ചെയ്തു.
സമീപത്തെ വീടിന് മുന്നിലെ ചെടി ചട്ടികളും നശിപ്പിച്ചിട്ടുണ്ട്. ഇടറോഡായ ഈ ഭാഗത്തെ വീടുകളില്‍ താമസിക്കുന്നവര്‍ക്ക് പാര്‍ക്കിങ് ഏരിയ ഇല്ലാത്തതിനാല്‍ റോഡരികിലാണു വാഹനങ്ങള്‍ പാര്‍ക്കു ചെയ്യുന്നത്.കഴിഞ്ഞ കുറേ നാളുകളായി മയക്കുമരുന്ന് ഉപയോഗിക്കുന്നവരും വില്‍പ്പനക്കാരും ഈ ഭാഗത്തു രാത്രി കാലങ്ങളില്‍ തമ്പടിക്കാറുണ്ടെന്നും ഇവര്‍ പ്രദേശവാസികള്‍ക്കു ബുദ്ധിമുട്ട് സൃഷ്ടിക്കുന്നുണ്ടെന്നും നാട്ടുകാര്‍ പരാതിപ്പെട്ടു.ഇത് സംബന്ധിച്ച് പൊലിസിനോട് പരാതിപ്പെട്ടതിന്റെ വൈരാഗ്യമാണോ കാര്‍ തകര്‍ത്തതിനു പിന്നിലെന്നു സംശയിക്കുന്നതായും നാട്ടുകാര്‍ പറഞ്ഞു.