കാളികാവ്: അണ്ടര്‍ 19 ദേശീയ ഫുട്‌ബോള്‍ ടീമില്‍ മലപ്പുറം ജില്ലയിലെ 13 താരങ്ങള്‍. ആസ്‌ട്രേലിയയില്‍ നടക്കുന്ന അന്തര്‍ദേശീയ സ്‌കൂള്‍ ഫുട്‌ബോള്‍ ടൂര്‍ണമെന്റില്‍ കളിക്കുന്ന ദേശീയ ടീമിലെ മുഴുവന്‍ കളിക്കാരും കേരളത്തില്‍നിന്നുള്ളവരാണ്.
പൂനെയില്‍ സമാപിച്ച ദേശീയ ഫുട്‌ബോള്‍ ടൂര്‍ണമെന്റിലെ വിജയികളായ കേരളാ ടീമിലെ അംഗങ്ങള്‍ക്കാണ് ദേശീയ ടീമില്‍ ഇടം ലഭിച്ചത്. ടീമിലെ 17 അംഗങ്ങളില്‍ 13 പേരും ജില്ലയുടെ താരങ്ങളാണ്. കോഴിക്കോട്ടുനിന്ന് മൂന്നുപേര്‍ക്കും കാസര്‍കോട്ടുനിന്ന് ഒരാള്‍ക്കും ടീമില്‍ ഇടം ലഭിച്ചിട്ടുണ്ട്. കളിക്കാരെല്ലാം പ്ലസ് ടു വിദ്യാര്‍ഥികളാണ്.
ദേശീയ സ്‌കൂള്‍ ഫുട്‌ബോള്‍ ടൂര്‍ണമെന്റില്‍ ശക്തരായ മഹാരാഷ്ട്രയെ ഒന്നിനെതിരേ നാല് ഗോളുകള്‍ക്കാണ് കേരളം തോല്‍പ്പിച്ചത്. കേരളത്തിനായി ഗോളുകള്‍ നേടിയതെല്ലാം മലപ്പുറത്തുകാരാണ്. കരുവാരകുണ്ട് കേരളാ എസ്റ്റേറ്റ് അടിവാരത്തെ മുഹമ്മദ് ഫവാസ്, അഭിജിത്ത് കരുവാരകുണ്ട്, ജസീം കരുവാരകുണ്ട്, മന്‍സൂര്‍ അരീക്കോട്, സവാദ് അരീക്കോട്, സല്‍മാന്‍ കൊണ്ടോട്ടി, അജ്മല്‍ കൊണ്ടോട്ടി, ശരത് പെരിന്തല്‍മണ്ണ, ജാസിര്‍ മങ്കട, ഷിജു മഞ്ചേരി, സഹല്‍ ചേലേമ്പ്ര, ഫര്‍സാന്‍ പൊന്നാനി, ഷിജനാഥ് മഞ്ചേരി എന്നിവരാണ് ജില്ലയില്‍നിന്നുള്ള കളിക്കാര്‍. രാഹുല്‍, നിയാസ്, കാര്‍ത്തിക് എന്നിവര്‍ കോഴിക്കോട് ജില്ലയില്‍നിന്നുള്ളവരാണ്. കാസര്‍കോട്ടുനിന്നുള്ള ഏക താരം മഷ്‌റൂക്കാണ്. റഷീദ് കൊട്ടാലുങ്ങലാണ് പരിശീലകന്‍.