കൊട്ടാരക്കര: ബാറില്‍ മദ്യപിക്കാനെത്തിയ യുവാവിനെ തട്ടിക്കൊണ്ടുപോയി സ്വര്‍ണം കവര്‍ന്ന രണ്ടു പ്രതികളെ കൊട്ടാരക്കര പൊലിസ് അറസ്റ്റ് ചെയ്തു. കൊട്ടാരക്കര പള്ളിക്കല്‍ ഷിഹാബ് മന്‍സിലില്‍ ഷിഹാബ് (31), കൊട്ടാരക്കര പുലമണ്‍ ഗോവിന്ദമംഗലം ബോസ് ഭവനില്‍ ബോസ്(42) എന്നിവരാണ് അറസ്റ്റിലായത്. കഴിഞ്ഞ 16നായിരുന്നു സംഭവം.
മൈലം ഇഞ്ചക്കാടുള്ള ഒരു ബാറില്‍ മദ്യപിക്കാനെത്തിയ ആളെ ഇരുവരും ചേര്‍ന്ന് ഓട്ടോറിക്ഷയില്‍ വീട്ടില്‍ കൊണ്ടുചെന്നാക്കാമെന്ന് പറഞ്ഞ് കയറ്റി പുത്തൂര്‍മുക്ക് ഭാഗത്ത് എത്തിയപ്പോള്‍ ദേഹോപദ്രവം ഏല്‍പിച്ച് മൂന്നര പവനോളം തൂക്കമുള്ള സ്വര്‍ണമാല പൊട്ടിച്ചെടുത്ത ശേഷം യുവാവിനെ റോഡിലുപേക്ഷിച്ച് കടന്നു കളയുകയായിരുന്നു.
മോഷ്ടിച്ച മാല പുലമണിലുള്ള സ്വര്‍ണപണയ സ്ഥാപനത്തില്‍ പണയം വച്ച് കാശ് വാങ്ങി ഇരുവരും പങ്കിട്ടെടുത്തു. കൊട്ടാരക്കര ഡിവൈ.എസ്.പി എ. അശോകന്റെ നിര്‍ദ്ദേശപ്രകാരം കൊട്ടാരക്കര സിഐ ബി.ഗോപകുമാര്‍ എസ് ഐ സി.കെ മനോജ് എസ് ഐമാരായ അരുണ്‍, മുരുകന്‍, നസ്‌റുദ്ദീന്‍, എ.എസ്.ഐ അജയന്‍. സി.പിഒമാരായ അജിത് കുമാര്‍, ഹോച്ച്മിന്‍.എസ്.ധര്‍മ, മനോജ് കുമാര്‍, എന്നിവരടങ്ങിയ സംഘമാണ് അന്വേഷണം നടത്തിയത്.