കണ്ണൂര്‍: അഴീക്കല്‍ ലൈറ്റ് ഹൗസിനു സമീപം കുറ്റിക്കാട്ടില്‍ ഉപേക്ഷിക്കപ്പെട്ടനിലയില്‍ കണ്ടെത്തിയ രണ്ടുദിവസം പ്രായമായ പെണ്‍കുഞ്ഞിന്റെ മാതാവിനായി പൊലിസ് അന്വേഷണം തുടങ്ങി. ജില്ലയിലെ പ്രസവശുശ്രൂഷ നടക്കുന്ന ആശുപത്രികള്‍ കേന്ദ്രീകരിച്ചാണു വളപട്ടണം പൊലിസ് അന്വേഷണം നടത്തുന്നത്. കഴിഞ്ഞ ഒരാഴ്ചയ്ക്കുള്ളില്‍ പ്രസവിച്ച അമ്മമാരുടെ ലിസ്റ്റ് പൊലിസ് ശേഖരിച്ചുവരികയാണ്. താമസിയാതെ മാതാവിനെ കണ്ടെത്താനാകുമെന്നു പൊലിസ് പറഞ്ഞു. തിങ്കളാഴ്ച വൈകുന്നേരമാണ് കുഞ്ഞിനെ കണ്ടെത്തിയത്. നാട്ടുകാര്‍ വിവരം അറിയിച്ചതിനെ തുടര്‍ന്നു വളപട്ടണം പൊലിസെത്തി കുഞ്ഞിനെ ജില്ലാ ആശുപത്രിയില്‍ എത്തിക്കുകയായിരുന്നു. ന്യൂബോണ്‍ ഐ.സി.യുവില്‍ കഴിയുന്ന കുഞ്ഞ് സുഖമായിരിക്കുന്നു.