ചങ്ങരംകുളം: മൂക്കുതലയില്‍ സി.പി.ഐ.എം നേതാവിന്റെ വീട് ഇന്നലെ പുലര്‍ച്ചെ ഒരു സംഘം അടിച്ചു തകര്‍ത്തു. വീട്ടുമുറ്റത്ത് നിര്‍ത്തിയിട്ടിരുന്ന കാറും ഗുഡ്‌സ് ഓട്ടോയും മൂന്ന് ബൈക്കുകളും സംഘം അടിച്ച് തകര്‍ത്തിട്ടുണ്ട്.
 കൂടാതെ വീട്ടിലെ കിണറ്റില്‍ നായയെ കൊന്ന് തളളിയ നിലയിലും കണ്ടെത്തി. മൂക്കുതല വാരിയര്‍ മൂലയില്‍ താമസിക്കുന്ന സി.പി.ഐ.എം നന്നംമുക്ക് ലോക്കല്‍ കമ്മിറ്റി അംഗവുംഡി.വൈ.എഫ്.ഐ എടപ്പാള്‍ ബ്ലോക്ക് ജോയിന്റ് സെക്രട്ടറിയും മുന്‍ പഞ്ചായത്ത് അംഗവുമായിരുന്ന അജയഘോഷിന്റെ വീടും വാഹനങ്ങളുമാണ് ഇന്നലെ പുലര്‍ച്ചെ സംഘം തകര്‍ത്തത്.
സി.പി.ഐ (എം)- ബി.ജെ.പി സംഘര്‍ഷം നടക്കുന്ന പ്രദേശമാണ് ഇത്. കഴിഞ്ഞ ദിവസം നടന്ന ഉത്സവത്തിനിടെ സംഘര്‍ഷം ഉണ്ടാവുകയും ഏതാനും പേര്‍ക്ക് പരിക്കേല്‍കുകയും ചെയ്തിരുന്നു. ഇതിന്റെ തുടര്‍ച്ചയാണോ സംഭവം എന്ന് സംശയിക്കുന്നുണ്ട് . ചങ്ങരംകുളം പൊലിസ് സ്ഥലത്തെത്തി. സംഭവത്തില്‍ കേസെടുത്തു അന്വേഷണം ആരംഭിച്ചിട്ടുണ്ട്. അജയഘോഷ് കഴിഞ്ഞ ഒരാഴ്ചയായി കുഞ്ഞുമായി ആശുപത്രിയില്‍ ആയിരുന്നു. സംഭവത്തിന് പിന്നില്‍ ആരാണെന്ന് അറിയില്ലെന്നും അന്വേഷണം തുടങ്ങിയിട്ടുണ്ടെന്നും പൊലിസ് പറഞ്ഞു. സംഭവത്തിന് പിന്നില്‍ ആര്‍.എസ്.എസ് ആണെന്ന് സി.പി.ഐ (എം) ആരോപിച്ചു.