പെരുമ്പടപ്പ്: പെരുമ്പടപ്പ് ഗ്രാമപഞ്ചായത്തിലെ ഒന്നാം വാര്‍ഡില്‍ ഉള്‍പ്പെടുന്ന  പാലപ്പെട്ടി അജ്മീര്‍ നഗറിലെ 150  കുടുംബങ്ങളാണ്   രൂക്ഷമായ കുടിവെള്ള ക്ഷാമം നേരിടുന്നത്.
 ഭക്ഷണം പാകം ചെയ്യാനും മറ്റു പ്രാഥമിക  ആവശ്യങ്ങള്‍ക്കും പോലും വെള്ളം ലഭിക്കാത്ത അവസ്ഥയാണ് ഇവിടെ. ഇവര്‍ ആശ്രയിച്ചിരുന്ന കുഴല്‍ക്കിണറില്‍ കടുത്ത വേനലിനെ തുടര്‍ന്ന് വെള്ളം താഴ്ന്നപ്പോള്‍ ഉപ്പുവെള്ളമാണ് ലഭിക്കുന്നത് . അതുകൊണ്ടുതന്നെ ഇപ്പോള്‍ ഈ സംവിധാനത്തെ ആശ്രയിക്കാന്‍ കഴിയാത്ത അവസ്ഥയുമാണ്.
ജലനിധിയുടെ  ഒരു പൈപ്പ് ലൈന്‍ ഇവിടെ ഉണ്ടെങ്കിലും എപ്പോള്‍ വെള്ളം എത്തും എന്ന് പറയാന്‍ പറ്റില്ല. വന്നാല്‍ തന്നെ വെള്ളമുണ്ടാകുന്ന  ഒരുമണിക്കൂര്‍ നേരംകൊണ്ട് ഈ കുടുംബങ്ങള്‍ക്ക് മുഴുവന്‍ ആവശ്യമായ വെള്ള ശേഖരിക്കാന്‍ കഴിയാറുമില്ല.
ജില്ലയില്‍ പലയിടത്തും വേനല്‍ ശക്തമായതിനെ തുടര്‍ന്ന് ഉണ്ടായ കുടിവെള്ള ക്ഷാമത്തെ നേരിടാന്‍ ശുദ്ധജല വിതരണം നടത്തുന്നുണ്ട് . പെരുമ്പടപ്പ് ഗ്രാമപഞ്ചായത്തും ഇത്തരത്തില്‍ ശുദ്ധജല വിതരണം നടത്തണം എന്നാണ് നാട്ടുകാരുടെ ആവശ്യം.