കോഴിക്കോട്: വിപണിയില്‍ തക്കാളിയുടെ വില കുതിച്ചുയരുന്നു. കഴിഞ്ഞ രണ്ടാഴ്ചക്കിടെ വിലയില്‍ കാര്യമായ കുറവുണ്ടായിട്ടില്ല. ഏറ്റവും ഉയര്‍ന്ന വിലയായ 70 രൂപയാണ് നിലവിലെ വിപണി വില. അതേസമയം കോഴിക്കോട് പാളയം മാര്‍ക്കറ്റില്‍ 60-50 രൂപയാണ് തക്കാളി വില. പെട്ടിയില്‍ വരുന്ന 27, 28 കിലോ ഉണ്ടായിരുന്ന തക്കാളി ഇപ്പോള്‍ 24, 25 ആയി കുറഞ്ഞു.
ലഭ്യതക്കുറവാണ് വിലവര്‍ധനയ്ക്കു കാരണമെന്ന് വ്യാപാരികള്‍ പറയുന്നു. ഒരു പെട്ടി തക്കാളിക്ക് 1,750 രൂപയാണ് നിലവിലെ മാര്‍ക്കറ്റ് വില. തമിഴ്‌നാട്ടില്‍ നിന്ന് തക്കാളി വരാത്തതും മൈസൂര്‍ തക്കാളി കാലവസ്ഥ മോശമായതോടെ നശിച്ചുപോയതും വരവ് കുറഞ്ഞതുമാണ് വില വര്‍ധിച്ചത്.
മൈസൂരിന്റ ഉള്‍ഗ്രാമങ്ങളില്‍ വിവിധ സ്ഥലങ്ങളില്‍ ഘട്ടം ഘട്ടമായി ശേഖരിച്ചാണ് ഇപ്പോള്‍ വിപണിയില്‍ തക്കാളി എത്തുന്നത്. എന്നാല്‍ വിലക്കുറവിലുള്ള വ്യത്യാസം ഉപഭോക്താക്കളെ ബാധിക്കുന്നില്ലെന്ന് കച്ചവടക്കാര്‍ പറയുന്നു. നിലവിലെ വില വര്‍ധനവ് ഒരു മാസത്തോളം പ്രതീക്ഷിക്കാമെന്നാണ് മൊത്തവിതരണക്കാര്‍ പറയുന്നത്.