കോഴിക്കോട്: പുതിയാപ്പയില്‍ ഒരു കുടുംബത്തിലെ അഞ്ചുപേര്‍ക്ക് മലമ്പനി ബാധയുണ്ടായത് സര്‍ക്കാര്‍ ഗൗരവമായി കാണുന്നതായും ഇക്കാര്യത്തില്‍ ഇതിനകം സ്വീകരിച്ച നടപടികളെക്കുറിച്ചും തുടര്‍ന്നു സ്വീകരിക്കേണ്ട നടപടികളെക്കുറിച്ചും ആരോഗ്യ വകുപ്പ് മന്ത്രിയെ ധരിപ്പിക്കുമെന്ന് ഗതാഗത വകുപ്പ് മന്ത്രി എ.കെ ശശീന്ദ്രന്‍. രോഗബാധയുണ്ടായ വീട് സന്ദര്‍ശിച്ചശേഷം പുതിയാപ്പ പ്രാഥമികാരോഗ്യ കേന്ദ്രത്തില്‍ നടന്ന അവലോകന യോഗത്തില്‍ സംസാരിക്കുകയായിരുന്നു അദ്ദേഹം.
പ്രദേശത്ത് മലമ്പനി പടരുന്നത് തടയാനായിട്ടുണ്ട്. ആരോഗ്യ പ്രവര്‍ത്തകര്‍ പ്രദേശത്തെയും പരിസരത്തെയും വീടുകളെല്ലാം സന്ദര്‍ശിച്ച് ബോധവല്‍ക്കരണവും മുന്‍കരുതല്‍ നടപടികളും സ്വീകരിച്ചു വരികയാണ്. ഇതിനകം ഇവിടെനിന്ന് 593 രക്ത സാമ്പിളുകള്‍ ശേഖരിച്ചിട്ടുണ്ട്. മലമ്പനി ബാധയുണ്ടാകുന്ന സാഹചര്യം ഒഴിവാക്കാനാണ് മുന്‍ഗണന നല്‍കുകയെന്നും മന്ത്രി പറഞ്ഞു. ഇതരസംസ്ഥാന തൊഴിലാളികളുടെ വാസയിടങ്ങളില്‍ അടിസ്ഥാന സൗകര്യം നിഷ്‌കര്‍ഷിക്കണമെന്ന് കോര്‍പറേഷന്‍ ആരോഗ്യ സ്ഥിരംസമിതി അധ്യക്ഷന്‍ കെ. ബാബുരാജ് യോഗത്തില്‍ അഭിപ്രായപ്പെട്ടു. കോര്‍പറേഷന്‍ സ്റ്റാന്‍ഡിങ് കമ്മിറ്റി ചെയര്‍മാന്‍ എം. രാധാകൃഷ്ണന്‍, ജില്ലാ മെഡിക്കല്‍ ഓഫിസര്‍ ആര്‍.എല്‍.സരിത, കൗണ്‍സിലര്‍മാരായ വി. റഹിയ, കെ. നിഷ, ജില്ലാ ലേബര്‍ ഓഫിസര്‍ (എന്‍ഫോഴ്‌സ്‌മെന്റ്) ബി.എസ് രാജീവ്, പി.എച്ച്.സി മെഡിക്കല്‍ ഓഫിസര്‍ ഡോ. സോണി ദേവസ്യ സംസാരിച്ചു.
ജില്ലാ വെക്ടര്‍ കണ്‍ട്രോള്‍ യൂനിറ്റിലെ ഹെല്‍ത്ത് ഇന്‍സ്‌പെക്ടര്‍ സി.എം വിനോദ് എലത്തൂര്‍ മുതല്‍ കുറ്റിച്ചിറ ഭാഗം വരെയുള്ള കടലോരത്ത് നടത്തുന്ന 'നല്ല ശീലം' പദ്ധതിയെക്കുറിച്ച് വിശദീകരിച്ചു. ഇക്കാര്യം പ്രചരിപ്പിക്കുന്ന സന്നദ്ധ പ്രവര്‍ത്തകര്‍ക്കായി രൂപകല്‍പ്പന ചെയ്ത പ്രത്യേക ബനിയന്‍ മന്ത്രി എ.കെ ശശീന്ദ്രന്‍ ഡി.എം.ഒ ആര്‍.എല്‍ സരിതക്ക് കൈമാറി.