ക്വലാലംപുര്‍: ഇന്ത്യന്‍ താരം സൈന നേവാള്‍ മലേഷ്യന്‍ മാസ്റ്റേഴ്‌സ് ബാഡ്മിന്റണ്‍ ചാംപ്യന്‍ഷിപ്പില്‍നിന്ന് പുറത്തായി. മുന്‍ ലോക ഒന്നാം നമ്പര്‍ താരവും ഒളിംപിക്‌സ് ജേതാവുമായി സ്‌പെയിനിന്റെ കരോലിന മാരിനാണ് സൈനയുടെ കുതിപ്പിന് വിരാമമിട്ടത്. ഈ വര്‍ഷം മികച്ച രീതിയില്‍ തുടങ്ങിയ സൈനയ്ക്ക് ആദ്യ ചാംപ്യന്‍ഷിപ്പില്‍ തന്നെ ഫൈനല്‍ കണ്ടെത്താനായില്ല. സെമിയില്‍ 21-16, 21-13 എന്ന സ്‌കോറിനായിരുന്നു മരിന്റെ വിജയം.

രണ്ടണ്ട് സെറ്റിലും ജയപ്രതീക്ഷയുണര്‍ത്താന്‍ സൈനയ്ക്ക് കഴിഞ്ഞില്ല. മുന്‍ ലോക ചാംപ്യന്റെ വേഗതയ്ക്കും സ്മാഷുകള്‍ക്കും സൈനയ്ക്ക് മറുപടിയില്ലായിരുന്നു. ആദ്യ സെറ്റിന്റെ തുടക്കത്തില്‍ തന്നെ ഏറെ പിന്നിലായ സൈന തിരിച്ചുവരവിന് ശ്രമിച്ചെങ്കിലും പരാജയപ്പെടുകയായിരുന്നു. ക്വാര്‍ട്ടറില്‍ ജാപ്പനീസ് താരം നൊസോമി ഒക്കുഹാരയെ തുരത്തിയാണ് സൈന സെമിയില്‍ പ്രവേശിച്ചത്. ഒക്കുഹാരയ്‌ക്കെതിരേ പ്രകടിപ്പിച്ച പോരാട്ടവീര്യം സൈനയ്ക്ക് സെമിയില്‍ ആവര്‍ത്തിക്കാനാവാത്തത് തോല്‍വിക്ക് കാരണമായി.