ഷില്ലോങ്: ഐ ലീഗില്‍ ഷില്ലോങ് ലജോങിനെ എതിരില്ലാത്ത ഒരു ഗോളിന് തകര്‍ത്ത് റിയല്‍ കശ്മിര്‍. ഷില്ലോങ് ലജോങിന്റെ മൈതാനത്ത് നടന്ന മത്സരത്തില്‍ രണ്ടാം പകുതിയിലാണ് കശ്മിര്‍ വിജയഗോള്‍ നേടിയത്. 74ാം മിനുട്ടില്‍ ആരോണ്‍ കറ്റീബിയാണ് ഷില്ലോങിന്റെ അന്തകനായത്. ജയത്തോടെ ലീഗില്‍ മൂന്നാം സ്ഥാനത്താണ് റിയല്‍ കശ്മിര്‍. 13 മത്സരങ്ങളില്‍ നിന്ന് ഏഴ് വിജയവും നാല് സമനിലയും രണ്ട് തോല്‍വിയുമടക്കം കശ്മിരിന് 25 പോയിന്റുണ്ട്. 13 മത്സരങ്ങളില്‍ നിന്ന് ഒരു ജയവും ഒരു സമനിലയും 11 തോല്‍വിയുമടക്കം നാല് പോയിന്റുമായി ഷില്ലോങ് ലജോങ് പട്ടികയില്‍ അവസാനക്കാരാണ്.

മറ്റൊരു മത്സരത്തില്‍ ചര്‍ച്ചില്‍ ബ്രദേഴ്‌സ് 2-1ന് നെരോക്ക എഫ്.സിയെ പരാജയപ്പെടുത്തി. 24ാം മിനുട്ടില്‍ വാര്‍ണെയ് കല്ലോണിന്റെ ഗോളില്‍ മുന്നില്‍ കടന്ന ശേഷമാണ് നെരോക്ക രണ്ട് ഗോളുകള്‍ വഴങ്ങി ചര്‍ച്ചിലിന് മുന്‍പില്‍ കീഴടങ്ങിയത്. ഇരട്ട ഗോളുകളുമായി വില്ലീസ് പ്ലാസയാണ് ചര്‍ച്ചിലിന് അനായാസ ജയം സമ്മാനിച്ചത്. 85, 91 മിനുട്ടുകളിലായിരുന്നു താരം വലചലിപ്പിച്ചത്. ജയത്തോടെ ചര്‍ച്ചില്‍ രണ്ടാമതെത്തി.