ലണ്ടന്‍: ലിവര്‍പൂള്‍ ഇംഗ്ലീഷ് പ്രീമിയര്‍ ലീഗ് കിരീടത്തിനുള്ള ഓട്ടം തുടരുന്നു. ഇന്നലെ നടന്ന മത്സരത്തില്‍ ക്രിസ്റ്റല്‍ പാലസിനെ 4-3ന് പരാജയപ്പെടുത്തി വീണ്ടും രണ്ടാം സ്ഥാനക്കാരായ സിറ്റിയുമായുള്ള പോയിന്റ് വ്യത്യാസം ഏഴാക്കി ഉയര്‍ത്തി. തോല്‍ക്കുമെന്ന് തോന്നിച്ചിരുന്ന മത്സരത്തില്‍ ലിവര്‍പൂള്‍ വിജയം പിടിച്ച് വാങ്ങുകയായിരുന്നു.
34-ാം മിനുട്ടില്‍ ക്രിസ്റ്റല്‍ പാലസ് താരം ആന്‍ഡ്രോസ് ടോണ്‍സെന്റാണ് ആദ്യം ഗോള്‍ കണ്ടെത്തിയത്. ആദ്യ പകുതി അവസാനിക്കുമ്പോള്‍ ലിവര്‍പൂള്‍ ഒരു ഗോളിന് പിറകിലായിരുന്നു. രണ്ടാം പകുതിയുടെ തുടക്കത്തില്‍ തന്നെ സലാഹ് ഗോള്‍ മടക്കി ലിവര്‍പൂള്‍ സമനില പിടിച്ചു. 53-ാം മിനുട്ടില്‍ ബ്രസീലിയല്‍ സൂപ്പര്‍ താരം ഫിര്‍മീഞ്ഞോയും ഗോള്‍ കണ്ടെത്തി ഒരു ഗോള്‍ ലീഡാക്കി ഉയര്‍ത്തി. എന്നാല്‍ 65-ാം മിനുട്ടില്‍ ജെയിംസ് ടോംസ്‌കിന്നിന്റെ ഗോളിലൂടെ ക്രിസ്റ്റല്‍ ഒപ്പമെത്തി. 75-ാം മിനുട്ടില്‍ സലാഹ് വീണ്ടും ലക്ഷ്യം കണ്ട് ഒരു ഗോള്‍കൂടി ലീഡുണ്ടാക്കി. 93-ാം മിനുട്ടില്‍ സെനഗല്‍ താരം സാഡിയോ മാനേയും ഗോള്‍ നേടി സ്‌കോര്‍ 4-2 എന്ന നിലയിലെത്തി. എന്നാല്‍ അവസാന മിനുട്ടില്‍ ക്രിസ്റ്റല്‍ താരം മാക്‌സ് മെയര്‍ ഗോള്‍ കണ്ടെത്തി സ്‌കോര്‍ 3-4 ലിലെത്തിച്ചു.

എന്നാല്‍ പിന്നെ എടുത്ത ടച്ചോടെ അവസാന വിസില്‍ മുഴങ്ങുകയും ചെയ്തു. മറ്റൊരു മത്സരത്തില്‍ 2-1ന് മാഞ്ചസ്റ്റര്‍ യുനൈറ്റഡ് ബ്രൈടനെ തകര്‍ത്തു. 27-ാം മിനുട്ടില്‍ പോള്‍ പോഗ്ബയാണ് യുനൈറ്റഡിന്റെ ആദ്യ ഗോള്‍ നേടിയത്. 42-ാം മിനുട്ടില്‍ റാഷ്‌ഫോര്‍ഡിന്റെ ഗോളിലൂടെ യുനൈറ്റഡ് ലീഡ് രണ്ടാക്കി ഉയര്‍ത്തി. ആദ്യ പകുതിക്ക് ശേഷം യുനൈറ്റഡ് രണ്ട് ഗോളിന്റെ ലീഡുമായി കളി അവസാനിപ്പിച്ചു. 72-ാം മിനുട്ടില്‍ ബ്രൈടന്‍ താരം പാസ്‌കല്‍ ഗ്രോബാണ് ആശ്വാസ ഗോള്‍ നേടിയത്. ജയത്തോടെ ആഴ്‌സനലിനെ പിന്തള്ളി യുനൈറ്റഡ് അഞ്ചാം സ്ഥാനത്തെത്തി. ലെസ്റ്റര്‍ സിറ്റി 4-3 എന്ന സ്‌കോറിന് വോള്‍വ്‌സിനോട് പരാജയപ്പെട്ടു. ഇതോടെ 32 പോയിന്റുമായി വോള്‍വ്‌സ് എട്ടാം സ്ഥാനത്തെത്തി. ന്യൂകാസില്‍ യുനൈറ്റഡ് എതിരില്ലാത്ത മൂന്ന് ഗോളിന് കാര്‍ഡിഫ് സിറ്റിയെ പരാജയപ്പെടുത്തി. വാട്‌ഫോര്‍ഡും ബേണ്‍ലിയും തമ്മിലുള്ള മത്സരം ഗോള്‍രഹിത സമനിലയില്‍ കലാശിച്ചു. എതിരില്ലാത്ത രണ്ട് ഗോളുകള്‍ക്ക് ബേണ്‍മൗത്ത് വെസ്റ്റ് ഹാമിനെ പരാജയപ്പെടുത്തി. സതാംപ്ടണും എവര്‍ടണും തമ്മിലുള്ള മത്സരത്തില്‍ 2-1 എന്ന സ്‌കോറിന് സതാംപ്ടണ്‍ ജയം കരസ്ഥമാക്കി.
ഇന്ന് നടക്കുന്ന മത്സരത്തില്‍ മാഞ്ചസ്റ്റര്‍ സിറ്റി ഹഡര്‍സ്ഫീല്‍ഡിനെ പരാജയപ്പെടുത്തുകയാണെങ്കിലും വീണ്ടും ലിവര്‍പൂളുമായുള്ള പോയിന്റ് വ്യത്യാസം നാലായി കുറയും. രാത്രി 9.30ന് നടക്കുന്ന മത്സരത്തില്‍ ടോട്ടനം ഫുള്‍ഹാമിനെ നേരിടും. രണ്ടും മൂന്നും സ്ഥാനത്ത് നില്‍ക്കുന്ന ടോട്ടനത്തിനും സിറ്റിക്കും നിര്‍ണായക മത്സരമാണിന്ന്.