ബെയ്ജിങ്: ചൈനയില്‍ കൊറോണ വൈറസ് ബാധിച്ച് മരിച്ചവരുടെ എണ്ണം 1500 കടന്നു. വെള്ളിയാഴ്ച 143 മരണങ്ങള്‍ കൂടി റിപ്പോര്‍ട്ട് ചെയ്യപ്പെട്ടതായി നാഷനല്‍ ഹെല്‍ത്ത് കമ്മീഷന്‍ അറിയിച്ചു. വൈറസിന്റെ പ്രഭവകേന്ദ്രമായ ഹുബേ പ്രവിശ്യയില്‍ നിന്നാണ് മരണങ്ങള്‍ റിപ്പോര്‍ട്ട് ചെയ്തത്. ഇതുവരെ 66,492 പേര്‍ക്കാണ് ചൈനയില്‍ വൈറസ് ബാധ സ്ഥിരീകരിച്ചത്. പുതായി 2,641 പേര്‍ക്കാണ് വൈറസ് സ്ഥിരീകരിച്ചത്.
രാജ്യം അത്യന്തം ഗുരുതരമായ അവസ്ഥയിലാണെന്ന് ചൈനയിലെ മുതിര്‍ന്ന ഉദ്യോഗസ്ഥന്‍ ലിയാങ് വാന്ന്യന്‍ അറിയിച്ചു. ഹൂബേയിലാണ് പ്രതിസന്ധി രൂക്ഷമായത്. എന്നാല്‍ ഹൂബേയ്ക്കു പുറത്തു 10 ദിവസത്തിനിടെ പുതുതായി കൊറോണ സ്ഥിരീകരിക്കുന്നവുടെ എണ്ണം കുറഞ്ഞതായും ഇത് ശുഭസൂചനയാണെന്നും അദ്ദേഹം അറിയിച്ചു. രോഗികളെ ചികിത്സിക്കാന്‍ വുഹാനില്‍ കൂടുതല്‍ ആശുപത്രികള്‍ നിര്‍മിക്കുമെന്നും അദ്ദേഹം പറഞ്ഞു. കൊറോണ രോഗികളെ ചികിത്സിക്കുന്ന ഡോക്ടര്‍മാര്‍ക്ക് വ്യാപകമായി വൈറസ് പിടിപെടുന്നതും ചൈനയ്ക്ക് പുതിയ വെല്ലുവിളിയായിരിക്കുകയാണ്. ചൈനയില്‍ വൈറസ് ബാധയേറ്റ ആരോഗ്യ പ്രവര്‍ത്തകരില്‍ കൂടുതലും വുഹാനിലെ ആശുപത്രിയില്‍ ജോലി ചെയ്യുന്നവരാണെന്നാണ് കണക്കുകള്‍. ആറ് ആരോഗ്യ പ്രവര്‍ത്തകര്‍ വൈറസ് ബാധിച്ച് മരിച്ചതായാണ് ആരോഗ്യ വകുപ്പിന്റെ വിശദീകരണം.