ചെറുവത്തൂര്‍: ഈ വര്‍ഷം സര്‍വിസില്‍ പ്രവേശിച്ച അധ്യാപകര്‍ക്ക് കൂടി കെ-ടെറ്റ് യോഗ്യതയില്‍ ഇളവനുവദിച്ചു ഉത്തരവിറങ്ങി. അതേസമയം, ഇളവു ലഭിച്ച മുഴുവന്‍ അധ്യാപകരും 2018-19 അധ്യയന വര്‍ഷം ആരംഭിക്കുന്നതിനു മുന്‍പ് ടെറ്റ് യോഗ്യത നേടണമെന്ന നിബന്ധനയുമുണ്ട്.
2015-16 അധ്യയന വര്‍ഷം വരെ സര്‍വിസില്‍ പ്രവേശിച്ച അധ്യാപകര്‍ക്ക് നേരത്തെ തന്നെ കെ-ടെറ്റ് യോഗ്യതയില്‍ ഇളവു നല്‍കിയിരുന്നു. പ്രസ്തുത ഇളവു ഈ വര്‍ഷം കൂടി ബാധകമാക്കണമെന്നാവശ്യപ്പെട്ട് നിരവധിപേര്‍ വിദ്യാഭ്യാസ വകുപ്പിന് അപേക്ഷ നല്‍കിയിരുന്നു. ഇതിന്റെ അടിസ്ഥാനത്തിലാണ് ഇളവു അനുവദിച്ചിരിക്കുന്നത്.
രാജി, റിട്ടയര്‍മെന്റ്, മരണം എന്നീ ഒഴിവുകളില്‍ ഈ വര്‍ഷം എയ്ഡഡ് വിദ്യാലയങ്ങളില്‍ ജോലിയില്‍ പ്രവേശിച്ചവര്‍ക്ക് തസ്തിക നിര്‍ണയം നടന്നില്ലെങ്കിലും ആവശ്യത്തിനു കുട്ടികളുണ്ടെങ്കില്‍ നിയമനാംഗീകാരം നല്‍കാമെന്നു നിര്‍ദേശം വന്നിരുന്നു. എന്നാല്‍ കെ-ടെറ്റ് യോഗ്യതയില്ലാത്തതിനാല്‍ വിദ്യാഭ്യാസ ഓഫിസുകളിലുള്ളവര്‍ നിയമനാംഗീകാരം നല്‍കിയില്ല.
ഈ അധ്യാപകര്‍ക്ക് പുതിയ ഉത്തരവ് ഗുണം ചെയ്യും. 2018-19 അധ്യയനവര്‍ഷാരംഭത്തില്‍ യോഗ്യത നേടാന്‍ കഴിയാത്ത അധ്യാപകരുടെ ഭാവി എന്താകും എന്നതിനെ കുറിച്ചോ, സര്‍ട്ടിഫിക്കറ്റിന്റെ കാലാവധി ഏഴുവര്‍ഷം എന്ന നിബന്ധന പിന്‍വലിക്കുന്നതിനെ കുറിച്ചോ യാതൊരു നിര്‍ദേശവും അഡീഷനല്‍ സെക്രട്ടറി പുറത്തിറക്കിയ ഉത്തരവിലില്ല.