ന്യൂ ഡല്‍ഹി: പോത്ത് പൂട്ട് മത്സരത്തിനിടെ റെക്കോര്‍ഡ് വേഗത്തില്‍ ഓടിയെന്ന് അവകാശപ്പെടുന്ന കര്‍ണാടക മൂഡബിദ്രി സ്വദേശി ശ്രീനിവാസ ഗൗഡയെ ഇന്ത്യന്‍ കായിക വകുപ്പ് വിളിപ്പിച്ചു. രണ്ട് ദിവസമായി ശ്രീനവാസ ഗൗഡയായിരുന്നു സോഷ്യല്‍ മീഡിയയിലെ താരം. ഉസൈന്‍ ബോള്‍ട്ടിന്റെ റെക്കോര്‍ഡ് തകര്‍ത്ത പോത്ത് പൂട്ടുകാരന്‍ എന്ന നിലയിലായിരുന്നു ശ്രീനിവാസ ഗൗഡ വൈറലായത്. പോത്ത് പൂട്ട് മത്സരത്തിനിടെ 142.5 മീറ്റര്‍ ഓടിയത് 13.62 സെക്കന്‍ഡ് കൊണ്ടായിരുന്നു. ഈ ദൂരം 100 മീറ്ററാക്കി ചുരുക്കിയാല്‍ 9.55 സെക്കന്‍ഡായിരിക്കും ശ്രീനിവാസ ഗൗഡയുടെ സമയം. ഒളിംപിക്‌സ് സ്വര്‍ണ മെഡല്‍ ജേതാവ് ഉസൈന്‍ ബോള്‍ട്ട് 100 മീറ്റര്‍ ഓടിയത് 9.58 സെക്കന്‍ഡിലായിരുന്നു. ഗൗഡ വൈറലായതോടെ വ്യവസായപ്രമുഖന്‍ ആനന്ദ് മഹീന്ദ്ര അടക്കമുള്ള പ്രമുഖര്‍ ട്വീറ്റുമായി രംഗത്തെത്തി.

''അദ്ദേഹത്തിന്റെ ശരീരം നോക്കൂ, അസാധാരണമായ അത്‌ലറ്റിക് കഴിവുകള്‍ ഉള്ളയാളാണ് ഈ മനുഷ്യന്‍. അദ്ദേഹമൊരു ഒളിംപിക് ഇവന്റില്‍ പങ്കെടുക്കണം, ശ്രീനിവാസയിലൂടെ നമുക്കൊരു സ്വര്‍ണമെഡല്‍ വേണം'', ആനന്ദ് മഹീന്ദ്ര ട്വീറ്റ് ചെയ്തു. ശ്രീനിവാസയെ പരിശീലിപ്പിക്കാന്‍ മുന്‍കൈയെടുക്കണമെന്ന് കേന്ദ്ര കായികമന്ത്രി കിരണ്‍ റിഡ്ജുവിനോട് മഹീന്ദ്ര അഭ്യര്‍ഥിക്കുകയും ചെയ്തു. പിന്നാലെ കിരണ്‍ റിഡ്ജുവിന്റെ മറുപടിയുമെത്തി. സ്‌പോട്‌സ് അതോറിറ്റിയിലേക്ക് ക്ഷണിച്ച് കായിക ക്ഷമത പരിശോധിക്കുമെന്നും കേന്ദ്ര കായിക മന്ത്രി കിരണ്‍ റിഡ്ജുവാണ് വ്യക്തമാക്കിയത്. ഒളിംപിക്‌സിന് വേണ്ട@ മികവുണ്ടെ@ങ്കില്‍ അത് പാഴായി പോകാന്‍ അനുവദിക്കില്ലെന്നും മന്ത്രി വ്യക്തമാക്കി. സ്‌പോര്‍ട്‌സ് അതോറിറ്റി ഓഫ് ഇന്ത്യയിലെ ഉന്നതര്‍ ശ്രീനിവാസ ഗൗഡയെ നേരില്‍ ക@ണ്ട് കായിക ക്ഷമതാ പരിശോധനയ്ക്ക് വിധേയനാക്കും. മൂടബദ്രിയിലെ ചെളിട്രാക്കില്‍ നടന്ന മല്‍സരത്തില്‍ 28വയസുകാരന്‍ ശ്രീനിവാസ ഗൗഡ കന്നുകാലികളെ തെളിച്ചാണ് ഈ റെക്കോര്‍ഡ് ഓടിത്തീര്‍ത്തത്. ചെറുപ്പം മുതലേ പോത്തുപൂട്ടിനോട് ഇഷ്ടമായിരുന്നെന്നും അതുകൊണ്ടാണ് ഇത്രയും വലിയ ആവേശത്തില്‍ മത്സരത്തില്‍ പങ്കെടുക്കാന്‍ കഴിഞ്ഞതെന്നും ശ്രീനിവാസ ഗൗഡ പറഞ്ഞു. പോത്ത് പൂട്ടിനായി പരിശീലനം നടത്താറുണ്ടെന്നും അദ്ദേഹം കൂട്ടിച്ചേര്‍ത്തു. കര്‍ണാടക കായിക വകുപ്പും ശ്രീനിവാസ ഗൗഡയെ സമീപിച്ചിട്ടുണ്ടെന്നാണ് വിവരം.