തേഞ്ഞിപ്പലം: സര്‍വകലാശാല വിദൂരവിദ്യാഭ്യാസ വിഭാഗത്തിലെ കെട്ടിടത്തിനുള്ളില്‍ പാകിയ ടൈല്‍സുകള്‍ തകര്‍ന്ന നിലയില്‍. സര്‍വകലാശാല ടാകോര്‍ നികേതന്‍ കെട്ടിടത്തോടു ചേര്‍ന്നുള്ള സ്‌കൂള്‍ ഓഫ് ഡിസ്റ്റന്‍സ് എജ്യൂക്കേഷന്‍ വിഭാഗം കെട്ടിടത്തിലെ പ്രധാന ഹാളിനുള്ളിലാണ് ടൈല്‍സുകള്‍ തകര്‍ന്നത്.
ആവശ്യമായ സിമന്റ്് ഉള്‍പ്പെടെയുള്ള സാമഗ്രികള്‍ ഉപയോഗിക്കാതെ പ്രവൃത്തി നടത്തിയതാണ് ടൈല്‍സുകള്‍ തകരാന്‍ കാരണമായത്. പത്തു വര്‍ഷം മുന്‍പു നിര്‍മിച്ച ടാഗോര്‍ നികേതന്‍ കെട്ടിടത്തിന്റെ കോംപൗണ്ടിനുള്ളില്‍ പാകിയ ഇന്റര്‍ലോക്കുകളും വിവിധ ഭാഗങ്ങളില്‍ തകര്‍ന്ന നിലയിലാണ്. തകര്‍ന്ന ഇന്റര്‍ലോക്കുകള്‍ വാഹനങ്ങള്‍ കയറുമ്പോള്‍ തെന്നിനീങ്ങുന്നതുമൂലം ബൈക്കുകള്‍ അപകടത്തില്‍പെടുന്നുണ്ട്. ദിനേന വിവിധ ആവശ്യങ്ങള്‍ക്കായി നൂറുകണക്കിന് ഉദ്യോഗാര്‍ഥികളും വിദ്യാര്‍ഥികളുമെത്തുന്ന കേന്ദ്രത്തില്‍ കാല്‍നട യാത്രക്കാര്‍ക്കും തകര്‍ന്നിളകിയ ഇന്റര്‍ലോക്കുകള്‍ ഭീഷണിയാകുന്നുണ്ട്.