കോഴിക്കോട്: ഹീര ഗ്രൂപ്പിന്റെ തട്ടിപ്പിനിരയായവര്‍ സിറ്റി പൊലിസ് കമ്മിഷണര്‍ക്ക് പരാതി നല്‍കി. കേസിന്റെ അന്വേഷണം ഊര്‍ജിതമാക്കാനും വഞ്ചിക്കപ്പെട്ടവരുടെ പരാതിയില്‍ എഫ്.ഐ.ആര്‍ നടപടികള്‍ കാര്യക്ഷമമാക്കണമെന്നും ആവശ്യപ്പെട്ടാണ് ആക്ഷന്‍ കമ്മിറ്റിയുടെ ആഭിമുഖ്യത്തില്‍ ഇന്നലെ സിറ്റി പൊലിസ് കമ്മിഷണര്‍ കോറി സഞ്ജയ് കുമാര്‍ ഗുരുഡിന് പരാതി നല്‍കിയത്. വിവിധ ജില്ലകളിലും ഇതര സംസ്ഥാനങ്ങളിലുമായി വ്യാപിച്ചു കിടക്കുന്ന ഗൗരവമേറിയ തട്ടിപ്പാണിതെന്നും ഇരകള്‍ക്ക് നീതി ലഭിക്കാനാവശ്യമായ നടപടികളുണ്ടാവുമെന്ന് കമ്മിഷണര്‍ പറഞ്ഞു. ചെമ്മങ്ങാട് സ്റ്റേഷനില്‍ ലഭിച്ച പരാതികളില്‍ എഫ്.ഐ.ആര്‍ തയാറാക്കാനും കമ്മിഷണര്‍ നിര്‍ദേശം നല്‍കി. കോഴിക്കോട് ചെമ്മങ്ങാട് പൊലിസിലാണ് തട്ടിപ്പ് സംബന്ധിച്ച പരാതികളുള്ളത്. പൊലിസ് നടപടി കാര്യക്ഷമല്ലെന്നും ഇതിനാലാണ് കമ്പനി മേധാവി നൗഹീറ ഷെയ്ക്ക് ഉള്‍പ്പെടെയുള്ളവര്‍ക്ക് ജാമ്യം കിട്ടിയതെന്നും പരാതിക്കാര്‍ പറയുന്നു. അതേസമയം തട്ടിപ്പിനു അന്തര്‍സംസ്ഥാന ബന്ധമുള്ളതിനാല്‍ ഉന്നതതല അന്വേഷണം വേണ്ടിവരുമെന്നാണു പൊലിസ് പറയുന്നത്. രണ്ടുകോടി രൂപയില്‍ അധികമുള്ള തട്ടിപ്പ് കേസുകള്‍ ലോക്കല്‍ പൊലിസ് കൈകാര്യം ചെയ്യേണ്ടെന്നും ക്രൈംബ്രാഞ്ചിന് കൈമാറണമെന്നും ഡി.ജി.പിയുടെ ഉത്തരവുണ്ട്.  ഇതിന്റെ അടിസ്ഥാനത്തില്‍ കേസന്വേഷണം ്രൈകംബ്രാഞ്ചിന് കൈമാറാനായി സിറ്റി പൊലിസ് കമ്മിഷണര്‍ക്കു സമര്‍പ്പിച്ചുവെന്ന് ചെമ്മങ്ങാട് പൊലിസ് പറയുന്നു. ഹീര ഗ്രൂപ്പ് എം.ഡിയും ഹൈദരാബാദ് സ്വദേശിനിയുമായ നൗഹീര ഷെയ്ഖ് കോഴിക്കോട് സാമ്പത്തിക തട്ടിപ്പിന് തുടക്കം കുറിച്ചത് ഹീര ഗ്രൂപ്പിന്റെ ബ്രാഞ്ച് കോഴിക്കോട് തുടങ്ങുന്നതിന് മുന്‍പാണെന്നും പൊലിസ് കണ്ടെത്തിയിട്ടുണ്ട്. 2012 അവസാനമാണ് കോഴിക്കോട് ഇടിയങ്ങരയില്‍ നാലര സെന്റ് സ്ഥലത്ത് സ്ഥാപനം തുടങ്ങിയതെങ്കിലും തട്ടിപ്പ് ലക്ഷ്യമിട്ട് 2012 ആദ്യത്തില്‍ തന്നെ നിക്ഷേപകരില്‍നിന്ന് പണം തട്ടാന്‍ ആരംഭിച്ചിരുന്നതായാണ് വിവരം.
പലിശ വാങ്ങുന്നത് നിഷിദ്ധമാണെന്ന് നിക്ഷേപകരെ ധരിപ്പിച്ച് വന്‍ ലാഭവിഹിതം വാഗ്ദാനം ചെയ്ത് നടത്തിയ സാമ്പത്തിക തട്ടിപ്പാണ് പുറത്തുവന്നത്.
കാസര്‍കോട് മുതല്‍ പാലക്കാട് വരെയുള്ള ജില്ലകളിലെ പ്രവര്‍ത്തനങ്ങള്‍ കോഴിക്കോട് ഓഫിസ് കേന്ദ്രീകരിച്ചാണ് നിയന്ത്രിച്ചിരുന്നത്. ഇതിനിടെ പൊലിസില്‍ പരാതി നല്‍കിയാല്‍ നിക്ഷേപിച്ച പണം തിരിച്ചുകിട്ടില്ലെന്ന ഭീഷണിയെ തുടര്‍ന്ന് പരാതിയുമായി എത്തിയവരടക്കം പിന്‍മാറുന്നതായും വാര്‍ത്തകളുണ്ട്.