മലപ്പുറം: സാംസ്‌കാരിക വൈവിധ്യം നിലനിര്‍ത്തുന്നതില്‍ മാധ്യമങ്ങളുടെ പങ്ക് നിസ്തുലമെന്നു കാലിക്കറ്റ് സര്‍വകലാശാല വൈസ് ചാന്‍സലര്‍ ഡോ. കെ. മുഹമ്മദ് ബഷീര്‍. പരസ്പര സൗഹാര്‍ദത്തിലൂന്നിയ ബഹുസ്വരതയുടെ ശ്രേഷ്ഠ കേരളീയ പാരമ്പര്യം നിലനിര്‍ത്തുന്നതിനും കൂടുതല്‍ സജീവമാക്കുന്നതിനും മാധ്യമങ്ങള്‍ക്കു സുപ്രധാന പങ്കുവഹിക്കാനാകുമെന്നും അദ്ദേഹം പറഞ്ഞു.
മലപ്പുറം പ്രസ്‌ക്ലബും കാലിക്കറ്റ് സര്‍വകലാശാലാ അറബിക് പഠനവിഭാഗവും സംയുക്തമായി യു.ജി.സിയുടെ സഹകരണത്തോടെ മലപ്പുറത്തു മാധ്യമപ്രവര്‍ത്തകര്‍ക്കായി 'ബഹുസംസ്‌കാര മാധ്യമം: അറബി പദാവലിയും മാധ്യമപ്രവര്‍ത്തകരും' എന്ന വിഷയത്തില്‍ സംഘടിപ്പിച്ച ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം.
അതത് പ്രദേശത്തിന്റെ ഭാഷാ സങ്കല്‍പത്തിന് അനുയോജ്യമായ ഭാഷാ വൈവിധ്യം മാധ്യമങ്ങള്‍ സ്വീകരിക്കേണ്ട ഘട്ടമാണിതെന്നു ചടങ്ങില്‍ മുഖ്യപ്രഭാഷണം നടത്തിയ മലയാള സര്‍വകലാശാല മാധ്യമ പഠനവിഭാഗം അധ്യാപകന്‍ ഡോ. ലാല്‍ മോഹന്‍ പറഞ്ഞു.  ഡോ. എ.ബി മൊയ്തീന്‍കുട്ടി, അബ്ദുല്‍ ലത്തീഫ് നഹ, പ്രസ്‌ക്ലബ് പ്രസിഡന്റ് ആര്‍. സാംബന്‍, ജനറല്‍ സെക്രട്ടറി സുരേഷ് എടപ്പാള്‍, സമീര്‍ കല്ലായി, എന്‍.പി സലാഹുദ്ദീന്‍ പങ്കെടുത്തു.