കൊല്ലം: ഈ വര്‍ഷത്തെ റിപ്പബ്ലിക് ദിനം ജില്ലയില്‍ വിപുലമായ പരിപാടികളോടെ ആഘോഷിക്കും. ജനുവരി 26ന് രാവിലെ എട്ടിന് കൊല്ലം ലാല്‍ ബഹദൂര്‍ ശാസ്ത്രി സ്റ്റേഡിയത്തിലാണ് റിപ്പബ്ലിക് ദിനാഘോഷം.
പൊലിസ്, എക്‌സൈസ്, ഫയര്‍ ആന്റ് റസ്‌ക്യൂ, ഫോറസ്റ്റ്, എന്‍ സി സി, സ്‌കൗട്ട്, ഗൈഡ്‌സ്, ജൂനിയര്‍ റെഡ് ക്രോസ്, സ്റ്റുഡന്റ് പോലീസ്, ബാന്‍ഡ് ട്രൂപ്പുകള്‍ എന്നീ വിഭാഗങ്ങള്‍ പരേഡില്‍ അണിനിരക്കും. സ്‌കൂള്‍ വിദ്യാര്‍ഥികള്‍ ഡിസ്‌പ്ലേ അവതരിപ്പിക്കും.
എ.ഡി.എം ബി. രാധാകൃഷ്ണന്റെ അധ്യക്ഷതയില്‍ കലക്‌ട്രേറ്റില്‍ ചേര്‍ന്ന യോഗത്തില്‍ ആഘോഷ പരിപാടികള്‍ക്ക് അന്തിമ രൂപം നല്‍കി. പൂര്‍ണമായും ഹരിതചട്ടങ്ങള്‍ പാലിക്കുന്നതിനാല്‍ പ്ലാസ്റ്റിക് നിര്‍മിത ദേശീയ പതാകകളും പ്രകൃതി സൗഹൃദമല്ലാത്ത മറ്റു വസ്തുക്കളും പരിപാടിയില്‍ ഒഴിവാക്കാന്‍ യോഗം തീരുമാനിച്ചു.
ആഘോഷ പരിപാടികളുമായി ബന്ധപ്പെട്ട വിവിധ പ്രവര്‍ത്തനങ്ങളുടെ ചുമതലകള്‍ ഉദ്യോഗസ്ഥര്‍ക്ക് നല്‍കി. ചടങ്ങില്‍ എല്ലാ ഉദ്യോഗസ്ഥരും പൊതുജനങ്ങളും പങ്കെടുക്കണമെന്നും വിദ്യാഭ്യാസ സ്ഥാപനങ്ങളിലും വ്യാപാര സ്ഥാപനങ്ങളിലും റിപ്പബ്ലിക് ദിനാഘോഷം സംഘടിപ്പിക്കണമെന്നും എ.ഡി.എം അറിയിച്ചു.