മുംബൈ: മഹാരാഷ്ട്രയില്‍ ഭരണം നടത്തുന്ന മഹാവികാസ് അഘാഡി സഖ്യത്തില്‍ വിള്ളലിന് വഴിയൊരുക്കി മുഖ്യമന്ത്രി ഉദ്ധവ് താക്കറെയുടെയും ശിവസേനയുടെയും നിലപാടുകള്‍. ഭീമാ കൊറേഗാവ് കേസിന്റെ അന്വേഷണം ദേശീയ അന്വേഷണ ഏജന്‍സിയായ എന്‍.ഐ.എ.യ്ക്കു വിട്ടുള്ള കേന്ദ്രസര്‍ക്കാര്‍ തീരുമാനം മഹാരാഷ്ട്ര സര്‍ക്കാര്‍ ശരിവയ്ക്കുകയും അതിനെ അനുകൂലിച്ച് ശിവസേന രംഗത്തെത്തുകയും ചെയ്തിരുന്നു. ഇതിനു പിന്നാലെ സംസ്ഥാനത്ത് എന്‍.പി.ആര്‍ നടപ്പാക്കുമെന്നു പ്രഖ്യാപിക്കുകയും ചെയ്തു. ഇതോടെയാണ് കോണ്‍ഗ്രസും എന്‍.സി.പിയും പരസ്യമായി ഇടഞ്ഞത്.
എന്‍.പി.ആര്‍ നടപ്പാക്കുമെന്ന തീരുമാനത്തിനെതിരേ കഴിഞ്ഞ ദിവസം എന്‍.സി.പി നേതാവ് ശരത് പവാര്‍ രംഗത്തെത്തിയിരുന്നു. ഭീമാ കൊറേഗാവ് കേസ് എന്‍.ഐ.എയ്ക്കു വിട്ട നിലപാടിനെതിരേയും രംഗത്തെത്തിയ അദ്ദേഹം, ഉദ്ധവ് സര്‍ക്കാര്‍ ചെയ്തതു തെറ്റാണെന്നു വ്യക്തമാക്കുകയും തീരുമാനം ഭരണഘടനാ ലംഘനമാണെന്ന് ആരോപിക്കുകയുമുണ്ടായി.
ഭീമാ കൊറേഗാവ് കേസിനൊപ്പം എല്‍ഗാര്‍ പരിഷത് കേസും എന്‍.ഐ.എയ്ക്കു വിട്ടിട്ടുണ്ട്. ഇതിനെതിരേയും ഇന്നലെ ശരത് പവാര്‍ രംഗത്തെത്തി.
ഭീമാ കൊറേഗാവ് കേസും എല്‍ഗാര്‍ പരിഷത് കേസും ഒന്നല്ലെന്നു വ്യക്തമാക്കിയ അദ്ദേഹം, സര്‍ക്കാര്‍ തീരുമാനത്തെ എതിര്‍ക്കുകയും ചെയ്തു. മുന്‍പ് മഹാരാഷ്ട്ര ഭരിച്ചിരുന്ന ദേവേന്ദ്ര ഫഡ്‌നാവിസിന്റെ നേതൃത്വത്തിലുള്ള ബി.ജെ.പി സര്‍ക്കാരിന് ഈ കേസുകളില്‍ പലതും മറച്ചുവയ്ക്കാനുണ്ടെന്നും അതിനാലാണ് കേസ് എന്‍.ഐ.എയ്ക്കു വിട്ടതെന്നും അദ്ദേഹം ആരോപിച്ചു. ഈ കേസ് പ്രത്യേക സംഘം അന്വേഷിക്കണമെന്നായിരുന്നു നേരത്തെ പവാര്‍ ആവശ്യപ്പെട്ടിരുന്നത്.
വിവാദങ്ങള്‍ക്കിടെ കഴിഞ്ഞ ദിവസം ശരത് പവാറും ഉദ്ധവ് താക്കറെയും വേദി പങ്കിടുകയും ചെയ്തു.