എരുമപ്പെട്ടി: എരുമപ്പെട്ടി കുട്ടഞ്ചേരി വനത്തില്‍ തീപിടിത്തം. പൂങ്ങോട് ഫോറസ്റ്റ് സ്റ്റേഷന്‍ പരിധിയിലുള്ള നെല്ലുവായ്  കുട്ടഞ്ചേരി വനപ്രദേശത്താണ് അഗ്‌നിബാധയുണ്ടായത്.
അടിക്കാടിന് പിടിച്ച തീ പിന്നീട് ഉള്‍കാട്ടിലേക്ക് പടരുകയായിരുന്നു. ഏക്കറ് കണക്കിന് വരുന്ന മാഞ്ചിയം പ്ലാന്റേഷനിലാണ് തീ പടര്‍ന്ന് പിടിച്ചത്. പാഴ്മരങ്ങളും മുളങ്കൂട്ടങ്ങളും അഗ്‌നിക്കിരയായി.  കുന്നംകുളത്ത് നിന്ന് ഫയര്‍ഫോഴ്‌സെത്തിയെങ്കിലും വാഹനം കയറാത്തതിനാല്‍  വനത്തിന് സമീപമുള്ള കുട്ടഞ്ചേരി സ്‌കൂളിന്  സംരക്ഷണം നല്‍കുന്നതിനായി നിലയുറപ്പിച്ചു.
വനപാലകരും നാട്ടുകാരും ചേര്‍ന്ന് മണിക്കൂറുകളോളം പരിശ്രമിച്ചാണ് തീയണച്ചത്. പൂങ്ങോട് ഫോറസ്റ്റ് ഡെപ്യുട്ടി റെയ്ഞ്ചര്‍ കെ.ടി സജീവ്, സെക്ഷന്‍ ഫോറസ്റ്റ് ഓഫിസര്‍മാരായ ജിമ്മി മാത്യു, പി.രാജീവന്‍, ബീറ്റ് ഫോറസ്റ്റ് ഓഫിസര്‍മാരായ എം.വി വിനയരാജ്, പി.എം അബ്ദുള്‍ റഹീം, പി.ആര്‍ രഞ്ജിത്ത് എന്നിവര്‍ തീയണക്കാന്‍ നേതൃത്വം നല്‍കി