കൊണ്ടോട്ടി: പാലക്കാട്-കോഴിക്കോട് ദേശീയ പാതയില്‍ നെടിയിരുപ്പു മുസ്‌ലിയാരങ്ങാടിയില്‍ ഓടിക്കൊണ്ടിരുന്ന ക്രെയ്‌നിനു തീ പിടിച്ചു. ഇന്നലെ രാത്രി 9.30 ഓടെ മുസ്‌ലിയാരങ്ങാടി ബസ് സ്‌റ്റോപ്പിനു സമീപത്താണ് അപകടം.
കോഴിക്കോട്ടു നിന്നു മലപ്പുറം ഭാഗത്തേക്കു പോവുകയായിരുന്ന ക്രെയ്‌നിനാണു തീപിടിച്ചത്. തീ കത്തുന്നതു കണ്ട ഡ്രൈവര്‍ വാഹനത്തില്‍ നിന്നിറങ്ങി രക്ഷപ്പെട്ടു. സംഭവ സ്ഥലത്തെ പളളിയില്‍ നിന്ന് ആളുകളെത്തി തീ അണക്കാന്‍ ശ്രമിച്ചെങ്കിലും നടന്നില്ല. മലപ്പുറത്തു നിന്നു രണ്ട് ഫയര്‍ യൂനിറ്റ് എത്തിയാണു തീ അണച്ചത്.
അപകടത്തെ തുടര്‍ന്നു കൊണ്ടോട്ടി സി.ഐ സന്തോഷിന്റെ നേതൃത്വത്തില്‍ പൊലീസെത്തി മൊറയൂരില്‍ വാഹനങ്ങള്‍ തിരിച്ചു വിട്ടു.
ആളുകളേയും വാഹനങ്ങളേയും സംഭവ സ്ഥലത്തു നിന്നു പൂര്‍ണമായും നീക്കിയാണു തീ അണച്ചത്.
വാഹനം പകുതിയിലേറെ കത്തിനശിച്ചു. സംഭവമറിഞ്ഞു നിരവധിപേരാണു സ്ഥലത്തെത്തിയത്. അപകടത്തിനു കാരണം വ്യക്തമായില്ല.