കയ്പമംഗലം: കയ്പമംഗലം ബോര്‍ഡില്‍ മോഷ്ടാക്കളുടെ ശല്യം ഏറുന്നതായി പരാതി. കഴിഞ്ഞ രണ്ട് ദിവസത്തിനിടെ രണ്ടിടങ്ങളിലാണ് മോഷണവും മോഷണ ശ്രമവുമുണ്ടായത്.
ദേശീയപാതയോരത്ത് പ്രവര്‍ത്തിക്കുന്ന ഡിലക്‌സ് വര്‍ക്‌ഷോപ്പിന്റെ ചുമര്‍ കുത്തിത്തുറന്ന് കടയില്‍ നിന്നും ബാറ്ററികള്‍ മോഷ്ടിച്ചിരുന്നു. വ്യാഴാഴ്ചയായിരുന്നു ഇത്.
രാവിലെ കട തുറക്കാനെത്തിയപ്പോഴാണ് വിവരമറിയുന്നത്. കയ്പമംഗലം പൊലിസില്‍ പരാതി നല്‍കി. ഇതിന്റെ അന്വേഷണം നടന്നുകൊണ്ടിരിക്കേ പിറ്റേന്ന് തൊട്ടടുത്ത വീട്ടില്‍ താമസിക്കുന്ന മുന്‍ പഞ്ചായത്തംഗം സി.ജി ജോഷിയുടെ വീട്ടിലും മോഷണ ശ്രമമുണ്ടായി.
വീടിനോട് ചേര്‍ന്നുള്ള ഔട്ട് ഹൗസിന്റെ വാതില്‍ തകര്‍ക്കുന്ന ശബ്ദം കേട്ട് വീട്ടുകാര്‍ ഉണരുകയായിരുന്നു. ലൈറ്റ് ഇട്ടതോടെ മോഷ്ടാക്കള്‍ ശ്രമമുപേക്ഷിച്ച് രക്ഷപ്പെട്ടു. സംഭവമറിഞ്ഞ് കയ്പമംഗലം പൊലിസ് സ്ഥലത്തെത്തിയിരുന്നു.