വടക്കഞ്ചേരി: ആലത്തൂര്‍ മോഡേണ്‍ റൈസ് മില്‍ ഏപ്രിലില്‍ വീണ്ടും തുറന്നു പ്രവര്‍ത്തനം ആരംഭിക്കുമെന്ന് കൃഷിമന്ത്രി വി എസ് സുനില്‍കുമാര്‍ നിയമസഭയില്‍ പറഞ്ഞു. ആലത്തൂര്‍ മോഡേണ്‍ റൈസ് മില്ലിന്റെ നടത്തിപ്പ്ചുമതല ആലത്തൂര്‍ മാര്‍ക്കറ്റിങ് സൊസൈറ്റിയെയോ സഹകരണ സംഘങ്ങളുടെ കണ്‍സോര്‍ഷ്യത്തെയോ ഏല്‍പിക്കുന്നതിനെ സംബന്ധിച്ച് കെ.ഡി പ്രസേനന്‍ എം.എല്‍.എ ഉന്നയിച്ച സബ്മിഷന് മറുപടി പറയുകയായിരുന്നു മന്ത്രി.
കേരള സ്‌റ്റേറ്റ് വെയര്‍ ഹൗസിങ് കോര്‍പറേഷന്റെ കീഴില്‍ 2000ല്‍ നിര്‍മാണനുമതി ലഭിക്കുകയും 2008ല്‍ പൂര്‍ത്തീകരിക്കുകയും ചെയ്തു. അന്നത്തെ മുഖ്യമന്ത്രി വി.എസ് അച്ചുതാനന്ദന്‍ 2008 ജനുവരി ഒന്നിന് ഉദ്ഘാടനം ചെയ്ത സ്ഥാപനം നല്ല രീതിയില്‍ പ്രവര്‍ത്തിച്ചു വരുമ്പോഴായിരുന്നു പ്രതിസന്ധി നേരിട്ടത്.
മില്ലിനാവശ്യമായിരുന്ന നെല്ല് നല്‍കിയിരുന്നത് ആലത്തൂര്‍ കോഓപ്പറേറ്റീവ് മാര്‍ക്കറ്റിങ് സൊസൈറ്റി ആയിരുന്നു. നെല്ലിന്റെ വില വര്‍ധിച്ചപ്പോള്‍ സൊസൈറ്റി നെല്ല് നല്‍കാന്‍ തയ്യാറായില്ല. ഇതേ തുടര്‍ന്ന് 2010 ജൂണ്‍ എട്ട് മുതല്‍ റൈസ് മില്ലിന്റെ പ്രവര്‍ത്തനം നിര്‍ത്തി വച്ചിരിക്കുകയായിരുന്നു.
ഈ സര്‍ക്കാര്‍ അധികാരത്തില്‍ വന്നതിനു ശേഷം 2016 ഓഗസ്റ്റ് 26ന് മില്‍ സന്ദര്‍ശിച്ച മന്ത്രി പ്രവര്‍ത്തനങ്ങള്‍ വിലയിരുത്തുകയും വര്‍ഷങ്ങളായി ഉപയോഗ ശൂന്യമായി കിടന്ന റൈസ് മില്‍ പുനരുദ്ധരിക്കുന്നതിന് ആവശ്യമയ നടപടികള്‍ സ്വീകരിക്കുകയും ചെയ്തു.
സമയബന്ധിതമായി അറ്റകുറ്റപണികള്‍ നടത്തി റൈസ് മില്‍ വീണ്ടും പ്രവര്‍ത്തന സജ്ജമാക്കിയിട്ടുണ്ട്. ഇവിടെ നിന്ന് നെല്ല് കുത്തി അരിയാക്കി ആദ്യ ലോഡ് ഫെബ്രുവരി 25ന് സിവില്‍ സപ്ലൈസ് കോര്‍പ്പറേഷന് നല്‍കുകയും ചെയ്തിട്ടുണ്ട്. ബാക്കിയുള്ള നെല്ല് അരിയാക്കുന്നതിനുള്ള നടപടികള്‍ പുരോഗമിച്ചു കൊണ്ടിരിക്കുകയാണ്. ഇതും സിവില്‍ സപ്ലൈസ് കോര്‍പറേഷന് നല്‍കാന്‍ കരാര്‍ ആയിട്ടുണ്ട്.
ഏകദേശം 30 ലക്ഷം രൂപ വിലവരുന്ന ഒരു സോര്‍ട്ടെക്‌സ് മെഷീന്‍ സ്ഥാപിക്കുന്നതിനുള്ള നടപടികള്‍ സ്വീകരിച്ചു വരികയാണ്. മാലിന്യ സംസ്‌കരണപ്ലാന്റിന്റെ ലൈസന്‍സ് പുതുക്കുന്നത്തിന് പൊല്യൂഷ്യന്‍ കണ്‍ട്രോള്‍ ബോര്‍ഡുമായി ബന്ധപ്പെട്ട് ആവശ്യമായ നടപടികള്‍ സ്വീകരിച്ചു വരികയാണ്.
ആലത്തൂര്‍ മോഡേണ്‍ റൈസ് മില്‍ പ്രവര്‍ത്തനസജ്ജമാകുന്നതോടെ ആലത്തൂര്‍ താലൂക്കിലെ 16 പഞ്ചായത്തുകളിലായി 12,000 ഏക്കര്‍ സ്ഥലത്ത് രണ്ട് വിള കൃഷിയിലും ഉല്‍പ്പാദിപ്പിക്കുന്ന മുഴുവന്‍ നെല്ലും പുഴുങ്ങി അരിയാക്കാന്‍ സാധിക്കുന്നതാണ്.
മില്ലിന്റെ നടത്തിപ്പ് ചുമതല ആരെ ഏല്‍പിക്കും എന്നതു സംബന്ധിച്ച് സിവില്‍ സപ്ലൈസ് കോര്‍പ്പറേഷനുമായി ചര്‍ച്ച നടന്നു വരികയാണെന്നും കൃഷിമന്ത്രി വി.എസ് സുനില്‍കുമാര്‍ പറഞ്ഞു.