അട്ടപ്പാടി: സാഹോദര്യത്തിന്റെ ഉത്തമ മാതൃകയാണ് പ്രവാചക ജീവിതമെന്ന് നെല്ലിപ്പതി ചര്‍ച്ച് മേധാവി ഫാദര്‍ സുനില്‍ പ്രസ്താവിച്ചു. പാണക്കാട് സയ്യിദ് സാബി ഖലി ശിഹാബ് തങ്ങള്‍ നയിക്കുന്ന സൗഹൃദ യാത്രക്ക് അഗളിയില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. മതങ്ങള്‍ തമ്മിലുള്ള ഐക്യം നഷ്ടപ്പെട്ടുകൊണ്ടിരിക്കുകയാണ്.
ലോകസംസ്‌കാരത്തിന് ഇന്ത്യാരാജ്യം നല്‍കിയ ഏറ്റവും വലിയ സംഭാവനയാണ് യഥാര്‍ത്ഥ മതേതരസങ്കല്‍പ്പം. ഇന്ത്യയാണ് മതേതരത്വം എന്തെന്ന് ലോകത്തിന് കാണിച്ചുകൊടുത്തത്. എന്നാല്‍ ഇന്ന് മതേതരത്വത്തിന്റെ അര്‍ത്ഥം മാറിത്തുടങ്ങിയിരിക്കുന്നു. ജനങ്ങള്‍ വിഭാഗീയതയിലേക്ക് ആനയിക്കപ്പെടുന്നു. ഇത്തരത്തില്‍ മതങ്ങള്‍ തമ്മില്‍ നേരത്തേയുണ്ടായിരുന്ന സൗഹാര്‍ദം വീണ്ടെടുക്കുക മാത്രമാണ് ഏക പോംവഴി. ഈ ശ്രമങ്ങളുടെ ഭാഗമായ ഓര്‍മ്മപ്പെടുത്തലാണ് എസ്.കെ.എസ്.എസ്.എഫ് സംഘടിപ്പിച്ച സൗഹാര്‍ദ യാത്ര. മതവും മതഗ്രന്ഥങ്ങളുമുദ്‌ഗോഷിക്കുന്ന മാര്‍ഗം വിശ്വാസികള്‍ സ്വീകരിച്ചാല്‍ വര്‍ഗ്ഗീയതക്കും അക്രമത്തിനും പരിഹാരമാവുമെന്നും അദ്ദേഹം കൂട്ടിച്ചേര്‍ത്തു.
സ്വീകരണം റഷീദ് അന്‍വരി ഉദ്ഘാടനം ചെയ്തു.അബ്ബാസ് അന്‍വരി, അയ്യപ്പക്ഷേത്ര ശാന്തിക്കാരന്‍ ജയദേവ വര്‍മ്മ, വിവിധ രാഷ്ട്രിയ പാര്‍ട്ടികളെ പ്രതിനിധികരിച്ച് ശിവശങ്കരന്‍, സി.പി. ബാബു, പരമേശ്വരന്‍, മുഹമ്മദ് ജാക്കിര്‍, പി.സി. ബേബി, രവീന്ദ്രദാസ്, രഘുത്ത മന്‍, കെ.ജെ റോയ് സംബന്ധിച്ചു.