മാഡ്രിഡ്: ഗോളില്‍ ആറാടി ബാഴ്‌സലോണ സ്പാനിഷ് ലാ ലിഗയില്‍ ഒന്നാം സ്ഥാനത്തേക്കു കയറി. സ്‌പോര്‍ടിങ് ഗിജോണിനെ ഒന്നിനെതിരേ ആറു ഗോളുകള്‍ക്ക് തകര്‍ത്താണു കറ്റാലന്‍ പട വിജയം സ്വന്തമാക്കിയത്. അതേസമയം ബാഴ്‌സയുടെ ചിരവൈരികളായ റയല്‍ മാഡ്രിഡിനു സമനില കുടുങ്ങുകയും ചെയ്തതോടെ ബാഴ്‌സയുടെ ഒന്നാം സ്ഥാനത്തേക്കുള്ള യാത്ര സുഗമമായി. റയല്‍ ദുര്‍ബലരായ ലാസ് പല്‍മാസിനോടാണു 3-3നു അപ്രതീക്ഷിത സമനില വഴങ്ങിയത്. മറ്റു മത്സരങ്ങളില്‍ വിയ്യാറല്‍ ഒന്നിനെതിരേ നാലു ഗോളുകള്‍ക്ക് ഒസാസുനയെ വീഴ്ത്തിയപ്പോള്‍ ഗ്രനാഡ 2-1നു ഡിപോര്‍ടീവോ ആല്‍വെസിനെ പരാജയപ്പെടുത്തി. സെല്‍റ്റ വിഗോ- എസ്പാന്യോള്‍ പോരാട്ടം 2-2നു സമനില.

ലൂയീസ് സുവാരസ് ഇരട്ട ഗോളുകള്‍ നേടിയ പോരാട്ടത്തില്‍ ഇരു പകുതികളിലായി മൂന്നു വീതം ഗോളുകള്‍ നേടിയാണു ബാഴ്‌സ വിജയം സ്വന്തമാക്കിയത്. മെസ്സിയും നെയ്മറും റാകിറ്റിചും അല്‍ക്കാസറും ഓരോ ഗോള്‍ വീതം നേടി. കളിയുടെ ഒന്‍പതാം മിനുട്ടില്‍ ലയണല്‍ മെസ്സിയാണു ഗോള്‍ വേട്ടയ്ക്ക് തുടക്കമിട്ടത്. ഹെഡ്ഡര്‍ ഗോളിലൂടെ സൂപ്പര്‍ താരം ബാഴ്‌സയെ മുന്നിലെത്തിച്ചു. പിന്നാലെ 11, 27 മിനുട്ടുകളില്‍ സുവാരസ് ഇരട്ട ഗോളുകളുമായി നിറഞ്ഞു. അതിനിടെ 21ാം മിനുട്ടില്‍ ഗിജോണ്‍ ഒരു ഗോള്‍ മടക്കിയെങ്കിലും അതു മതിയാകില്ലായിരുന്നു ബാഴ്‌സയെ തളക്കാന്‍. രണ്ടാം പകുതി തുടങ്ങി 49ാം മിനുട്ടില്‍ അല്‍ക്കാസര്‍ ബാഴ്‌സയ്ക്കു നാലാം ഗോളും 65ാം മിനുട്ടില്‍ മികച്ച ഫ്രീ കിക്കിലൂടെ നെയ്മര്‍ അഞ്ചാം ഗോളും നേടിയപ്പോള്‍ കളി തീരാന്‍ നിമിഷങ്ങള്‍ മാത്രമുള്ളപ്പോള്‍ 87ല്‍ റാക്കിറ്റിച് പട്ടിക പൂര്‍ത്തിയാക്കി.

സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ ഇരട്ട ഗോളുകളാണു ലാസ് പല്‍മാസിനെതിരേ വന്‍ തോല്‍വിയില്‍ നിന്നു റയലിനെ സമനിലയുമായി രക്ഷപ്പെടുത്തിയത്. എട്ടാം മിനുട്ടില്‍ ഇസ്‌കോയുടെ ഗോളില്‍ മുന്നിലെത്തിയ റയലിനെ രണ്ടു മിനുട്ടിന്റെ ഇടവേളയില്‍ ഗോള്‍ നേടി ഞെട്ടിച്ച ലാസ് പല്‍മാസ് രണ്ടാം പകുതിയുടെ 56, 59 മിനുട്ടുകളിലും ഗോള്‍ നേടി അട്ടിമറി ഭീഷണിയുയര്‍ത്തി. നാല്‍പ്പത്തേഴാം മിനുട്ടില്‍ ഗെരത് ബെയ്ല്‍ ചുവപ്പു കാര്‍ഡ് കണ്ടതോടെ റയലിനു പത്തു പേരുമായി കളിക്കേണ്ടി വന്നതും തിരിച്ചടിയായി. ഒടുവില്‍ അവസാന നാലു മിനുട്ടിനിടയില്‍ സംഭവിച്ച നാടകീയതയ്‌ക്കൊടുവിലാണു ക്രിസ്റ്റ്യാനോയുടെ തുടരെയുള്ള ഗോളുകളുമായി റയല്‍ സമനില കഷ്ടിച്ച് സ്വന്തമാക്കിയത്.

25 മത്സരങ്ങള്‍ പൂര്‍ത്തിയായപ്പോള്‍ 57 പോയിന്റുകളുമായി ബാഴ്‌സലോണ ഒന്നാം സ്ഥാനത്ത്. ഒരു മത്സരം കുറച്ചു കളിച്ച റയലിനു 56 പോയിന്റ്. സെവിയ്യ 52 പോയിന്റുമായി മൂന്നാമതും അത്‌ലറ്റിക്കോ 45 പോയിന്റുമായി നാലാം സ്ഥാനത്തും. ലാ ലിഗയില്‍ കിരീടപ്പോരാട്ടം കനക്കുകയാണ്. ഒരു കളി ബാഴ്‌സയേക്കാള്‍ കുറച്ചു കളിച്ചതിന്റെ ആശ്വാസം മാത്രമാണു റയലിനുള്ളത്.