കോഴിക്കോട്: രഞ്ജി ട്രോഫി സെമിഫൈനലില്‍ കേരളം വിദര്‍ഭയെ നേരിടും. ക്വാര്‍ട്ടര്‍ ഫൈനലില്‍ ഉത്തരാഖണ്ഡിനെ പരാജയപ്പെടുത്തിയാണ് വിദര്‍ഭ സെമിഫൈനലിന് ടിക്കെറ്റെടുത്തത്. നേരത്തെ ഗുജറാത്തിനെ തകര്‍ത്ത് കേരളം ചരിത്രത്തിലാദ്യമായി രഞ്ജി ട്രോഫി സെമിഫൈനലിലെത്തിയിരുന്നു.

24ന് വയനാട്ടിലെ കൃഷ്ണഗിരി സ്റ്റേഡയിത്തിലാണ് കേരളം - വിദര്‍ഭ സെമി ഫൈനല്‍ നടക്കുന്നത്. മറ്റൊരു സെമിഫൈനലില്‍ സൗരാഷ്ട്ര - കര്‍ണാടകയെ നേരിടും. ക്വാര്‍ട്ടറില്‍ ഉത്തര്‍പ്രദേശിനെ രഞ്ജി ട്രോഫി ചരിത്രത്തിലെ ഏറ്റവും വലിയ റണ്‍ചേസിലൂടെ തകര്‍ത്താണ് സൗരാഷ്ട്ര സെമിയിലെത്തിയത്. ആദ്യ ഇന്നിങ്‌സില്‍ ഉത്തര്‍പ്രദേശ് ഉയര്‍ത്തിയ 385 റണ്‍സ് പിന്തുടര്‍ന്ന സൗരാഷ്ട്രക്ക് 10 വിക്കറ്റ് നഷ്ടത്തില്‍ 208 റണ്‍സെടുക്കാനെ സാധിച്ചിരുന്നുള്ളൂ.

177 റണ്‍സ് ലീഡുമായി രണ്ടാം ഇന്നിങ്‌സ് ബാറ്റിങ് തുടര്‍ന്ന ഉത്തര്‍ പ്രദേശിനെ 194 റണ്‍സില്‍ എറിഞ്ഞിട്ട സൗരാഷ്ട്ര നാല് വിക്കറ്റ് നഷ്ടത്തില്‍ ലക്ഷ്യത്തിലെത്തിയാണ് ചരിത്രം തിരുത്തിയെഴുതിയത്.

സെഞ്ചുറി നേടിയ ഹര്‍വിക് ദേശായി (116), അര്‍ധ സെഞ്ചുറികളുമായി മികച്ച പിന്തുണ നല്‍കിയ സ്‌നെല്‍ പട്ടേല്‍ (72), ചേതേശ്വര്‍ പൂജാര (67*), ഷെല്‍ഡണ്‍ ജാക്‌സണ്‍ (73*) എന്നിവരാണ് സൗരാഷ്ട്രയെ വിജയത്തിലേക്ക് നയിച്ചത്.