കണ്ണൂര്‍: വിദ്യാഭ്യാസ മൂല്യങ്ങള്‍ ഉയര്‍ത്തിപ്പിടിച്ച് പതിനൊന്നാമത് സംസ്ഥാന വാഫി കലോത്സവം സമാപിച്ചു. വൈജ്ഞാനിക വിചാരധാരയുടെ പുത്തന്‍ ചുവടുവയ്പ് സമൂഹത്തിന് പരിചയപ്പെടുത്താനുള്ള അവസരം കൂടിയായിരുന്നു മുണ്ടയാട് ഇന്‍ഡോര്‍ സ്റ്റേഡിയത്തില്‍ നടന്ന കലോത്സവം.

വിദ്യാര്‍ഥികളും രക്ഷിതാക്കളും പങ്കാളികളായ അര്‍ഹാം അസംബ്ലിയും സെമിനാറുകളും പ്രഭാഷണങ്ങളും ഭാവിയിലേക്കുള്ള കരുതലിന്റെ ചുവടുവയ്പ് കൂടിയായി മാറി. സംസ്ഥാനത്തിനകത്തും പുറത്തുനിന്നുമുള്ള വാഫി കോളജുകളിലെ അയ്യായിരത്തോളം വിദ്യാര്‍ഥികള്‍ കലോത്സവത്തിനെത്തി.
പൊതുസമ്മേളനം പാണക്കാട് സയ്യിദ് അബ്ബാസലി ശിഹാബ് തങ്ങളും വിദ്യാഭ്യാസ സെമിനാര്‍ പാണക്കാട് മുനവറലി ശിഹാബ് തങ്ങളും ഉദ്ഘാടനം ചെയ്തു.
സമാപന ഉദ്ഘാടനം പാണക്കാട് സാദിഖലി ശിഹാബ് തങ്ങള്‍ നിര്‍വഹിച്ചു. ചേലക്കാട് മുഹമ്മദ് മുസ്‌ലിയാര്‍ അധ്യക്ഷനായി. പ്രൊഫ. അബ്ദുല്‍ ഹകീം ഫൈസി ആദൃശ്ശേരി സമാപനപ്രഭാഷണം നടത്തി. സാബിഖലി ശിഹാബ് തങ്ങള്‍ അനുഗ്രഹ പ്രഭാഷണം നിര്‍വഹിച്ചു.

കെ.കെ.പി അബ്ദുല്ല മുസ്‌ലിയാര്‍, ടി.എസ് ഇബ്രാഹിം മുസ്‌ലിയാര്‍, എം.എല്‍.എമാരായ കെ.സി ജോസഫ്, കെ.എം ഷാജി, മുന്‍ എം.എല്‍.എ എ.പി അബ്ദുല്ലക്കുട്ടി, ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് ഒ.കെ വിനീഷ്, വി.കെ അബ്ദുല്‍ഖാദര്‍ മൗലവി, പി. അനീസുദ്ദീന്‍, അബ്ദുല്‍കരീം ചേലേരി, ഇബ്രാഹിംകുട്ടി തിരുവട്ടൂര്‍, മുസ്തഫ എളമ്പാറ, ഡോ.താജുദീന്‍ വാഫി, താജുദ്ദീന്‍ ഞെക്ലി, പനക്കാട്ട് അബ്ദുല്‍ഖാദര്‍ സംസാരിച്ചു.