മുക്കം (കോഴിക്കോട്): വാഹന പാര്‍ക്കിങ് ഏരിയ ചട്ടവിരുദ്ധമായി മറ്റ് ആവശ്യങ്ങള്‍ക്ക് ഉപയോഗിക്കുന്നതിന് കര്‍ശന നിയന്ത്രണം കൊണ്ടുവരാന്‍ സര്‍ക്കാര്‍ തീരുമാനം.
സംസ്ഥാനത്തെ വാണിജ്യ സ്ഥാപനങ്ങളും മറ്റു ബഹുനില മന്ദിരങ്ങളും പാര്‍ക്കിങ് ഏരിയ എന്ന നിലയില്‍ അനുമതി വാങ്ങിയ സ്ഥലങ്ങള്‍ മറ്റ് ആവശ്യത്തിനായി ഉപയോഗിക്കുന്നതായി കണ്ടെത്തിയതിനെ തുടര്‍ന്നാണ് നടപടി കര്‍ശനമാക്കാന്‍ സര്‍ക്കാര്‍ തീരുമാനിച്ചത്.

പാര്‍ക്കിങ് ഏരിയയായി നീക്കിവച്ചിട്ടുള്ള ഭാഗങ്ങള്‍ ഒക്യുപെന്‍സി സര്‍ട്ടിഫിക്കറ്റ് കൈപ്പറ്റിയ ശേഷം കെട്ടിയടച്ച് വാണിജ്യ ആവശ്യങ്ങള്‍ക്കും മറ്റും ഉപയോഗിച്ചു വരുന്നതായുള്ള നിരവധി പരാതികള്‍ സര്‍ക്കാരിനു ലഭിച്ചിരുന്നു. ഇതിന്റെ അടിസ്ഥാനത്തിലാണ് തദ്ദേശ സ്വയംഭരണ വകുപ്പ് സ്‌പെഷല്‍ സെക്രട്ടറിയുടെ അധ്യക്ഷതയില്‍ ചേര്‍ന്ന യോഗം നിയന്ത്രണങ്ങള്‍ കൊണ്ടുവരാന്‍ തീരുമാനിച്ചത്.

ഇനി മുതല്‍ കെട്ടിടത്തിന്റെ പ്രവൃത്തി പൂര്‍ത്തിയാക്കിയ ശേഷം ഒക്യുപെന്‍സി സര്‍ട്ടിഫിക്കറ്റ് നല്‍കുമ്പോള്‍ കംപ്ലീഷന്‍ പ്ലാനിന്റെ സാക്ഷ്യപ്പെടുത്തിയ പകര്‍പ്പുകൂടി അപേക്ഷകന് തദ്ദേശ സ്വയംഭരണ സ്ഥാപന സെക്രട്ടറി നല്‍കണമെന്ന് സര്‍ക്കാര്‍ നിര്‍ദേശം നല്‍കി. പാര്‍ക്കിങ് ഏരിയയുടെ ദുരുപയോഗം തടയുന്നതിനും കംപ്ലീഷന്‍ പ്ലാനില്‍നിന്ന് രൂപമാറ്റം വരുത്തി മറ്റു നിര്‍മാണ പ്രവൃത്തികള്‍ നടത്തിയിട്ടില്ലെന്ന് ഭാവിയില്‍ നടക്കുന്ന പരിശോധനകളില്‍ ഉറപ്പുവരുത്തുന്നതിനുമാണ് കംപ്ലീഷന്‍ പ്ലാനിന്റെ സാക്ഷ്യപ്പെടുത്തിയ പകര്‍പ്പുകൂടി നല്‍കാന്‍ നിര്‍ദേശം നല്‍കിയത്.