തിരുവനന്തപുരം: നാലു ഡി.ജി.പിമാര്‍ക്ക് തസ്തിക നല്‍കുന്നതു സംബന്ധിച്ച് ആഭ്യന്തര സെക്രട്ടറിയും ചീഫ് സെക്രട്ടറിയും തമ്മില്‍ ഇടയുന്നു. എ.ഡി.ജി.പിമാരായ എ.ഹേമചന്ദ്രന്‍, ശങ്കര്‍റെഡ്ഡി, രാജേഷ് ദിവാന്‍, മുഹമ്മദ് യാസീന്‍ എന്നിവര്‍ക്ക് കേന്ദ്ര പേഴ്‌സണല്‍ മന്ത്രാലയത്തിന്റെയും എ.ജിയുടെയും എതിര്‍പ്പ് മറികടന്ന് യു.ഡി.എഫ് സര്‍ക്കാര്‍ പ്രൊമോഷന്‍ നല്‍കിയതാണ് പോരിനിടയാക്കിയത്.

ഇവരെ ഡി.ജി.പിമാരാക്കിയത് ചട്ടംലംഘിച്ചാണെന്നുള്ള റിപ്പോര്‍ട്ട് ആഭ്യന്തര സെക്രട്ടറി നളിനി നെറ്റോ മുഖ്യമന്ത്രിക്ക് കൈമാറി. ഇതിനെതിരേയാണ് ചീഫ് സെക്രട്ടറി വിജയാനന്ദ് രംഗത്തെത്തിയത്. ഇവരെ ഡി.ജി.പിമാരായിതന്നെ നിയമിക്കണമെന്ന നിലപാടിലാണു ചീഫ് സെക്രട്ടറി. നളിനി നെറ്റോയുടെ റിപ്പോര്‍ട്ടില്‍ ചീഫ് സെക്രട്ടറി വിയോജനക്കുറിപ്പെഴുതിയതായാണു സൂചന.

അതേസമയം, നിലവില്‍ മാരപാണ്ഡ്യന്‍, വിശ്വാസ് മേത്ത,സുബ്രദോ വിശ്വാസ്, രാജീവ് സദാനന്ദന്‍, ഷീലാ തോമസ് എന്നിവരെ അഡിഷണല്‍ ചീഫ് സെക്രട്ടറി റാങ്കില്‍ അധികമായി നിയമിച്ചിട്ടുണ്ട്. ഇവരെയും സര്‍ക്കാരിന് തരംതാഴ്‌ത്തേണ്ടി വരും. കൂടാതെ പൊലിസില്‍ എഡി.ജി.പി റാങ്കില്‍ അധികമായുള്ളവരുടെ കാര്യത്തിലും തീരുമാനമെടുക്കേണ്ടി വരും. ഇതോടെ പ്രശ്‌നം അഡ്മിനിസ്‌ട്രേറ്റീവ് ട്രൈബൂണലിലേയ്ക്കു നീങ്ങും. അതുകൊണ്ട് വിശദമായി പഠിച്ചതിനു ശേഷം മതി തസ്തികയുടെ കാര്യത്തിലുള്ള തീരുമാനമെന്നാണ് ചീഫ് സെക്രട്ടറിയുടെ നിലപാട്.