കോഴിക്കോട്: വിദ്യാര്‍ഥികള്‍ക്കും യുവാക്കള്‍ക്കും കഞ്ചാവ് വില്‍പന നടത്തുന്നതിനിടെ മോഷണക്കേസ് പ്രതിയായ യുവാവ് പൊലിസ് പിടിയില്‍. കോഴിക്കോട് പയ്യാനക്കല്‍ ചാമുണ്ടിവളപ്പ് സ്വദേശി അഭിനാസി (36) നെയാണ് കസബ എസ്.ഐ സിജിത്തും സംഘവും കോഴിക്കോട് നോര്‍ത്ത് അസിസ്റ്റന്റ് കമ്മിഷണര്‍ പൃഥ്വിരാജന്റെ നേതൃത്വത്തിലുള്ള ജില്ലാ ആന്റി നാര്‍കോട്ടിക് സ്‌പെഷല്‍ ആക്ഷന്‍ ഫോഴ്‌സും ചേര്‍ന്ന് പിടികൂടിയത്. ഇന്നലെ ഉച്ചയ്ക്കു ശേഷം ഗംഗാ തിയറ്ററിനു സമീപത്തുള്ള റോഡിലൂടെ ഓട്ടോറിക്ഷയില്‍ വന്ന ഇയാള്‍ പൊലിസിനെ കണ്ടതോടെ ഓട്ടോയില്‍ നിന്നിറങ്ങി ഓടിരക്ഷപ്പെടാന്‍ ശ്രമിക്കുകയായിരുന്നു. തുടര്‍ന്ന് കസബ എസ്.ഐ സിജിത്തും സംഘവും ബലപ്രയോഗത്തിലൂടെ കീഴ്‌പ്പെടുത്തുകയായിരുന്നു. 1.300 കിലോ കഞ്ചാവ് ഇയാളില്‍ നിന്ന് കണ്ടെടുത്തു. തമിഴ്‌നാട്ടില്‍നിന്ന് ബസ് മാര്‍ഗം കഞ്ചാവ് കോഴിക്കോട്ടെത്തിച്ച് 100 ഗ്രാമിന്റെ ചെറിയ പാക്കറ്റുകളിലാക്കി ഇടനിലക്കാര്‍ മുഖാന്തരം ആവശ്യക്കാര്‍ക്ക് വില്‍പന നടത്തുന്നതാണ് ഇയാളുടെ രീതി. മയക്കുമരുന്ന് ഉപയോഗിക്കുന്നതിനാവശ്യമായ പണം കണ്ടെത്തുന്നതിനു വേണ്ടിയാണ് കഞ്ചാവ് കച്ചവടം നടത്തുന്നത്. ഇതിനുപുറമെ 25ഓളം മാലമോഷണ കേസുകളിലും നിരവധി കഞ്ചാവ് കേസുകളിലും ഇയാള്‍ പ്രതിയാണ്.
കസബ എസ്.ഐ സിജിത്തിന്റെ നേതൃത്വത്തില്‍ എ.എസ്.ഐ ദിനേശന്‍, സിവില്‍ പൊലിസ് ഓഫീസര്‍ രാജേഷ് എന്നിവരും ഡന്‍സാഫ് അംഗങ്ങളായ എ.എസ്.ഐ മുനീര്‍, കെ. രാജീവ്, എം. മുഹമ്മദ് ഷാഫി, എം. സജി, കെ. അഖിലേഷ്, കെ.എ ജോമോന്‍, എന്‍. നവീന്‍, പി. സോജി, പി.കെ രതീഷ്, രജിത്ത് ചന്ദ്രന്‍, എം. ജിനേഷ്, എ.വി സുമേഷ് എന്നിവരും ഉള്‍പ്പെട്ട സംഘമാണു പ്രതിയെ പിടികൂടിയത്. ഇയാളെ ചോദ്യം ചെയ്തതില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ ഇയാള്‍ക്ക് കഞ്ചാവ് എത്തിച്ചുനല്‍കുന്നവരെ കുറിച്ചും ഇയാളില്‍ നിന്ന് കഞ്ചാവ് വാങ്ങുന്നവരെ കുറിച്ചുമുള്ള അന്വേഷണം ആരംഭിച്ചതായി കോഴിക്കോട് കസബ സി.ഐ ഹരിപ്രസാദ് അറിയിച്ചു.