കാട്ടാക്കട: മാറനല്ലൂര്‍ അരുവിക്കര പൂവന്‍വിളയില്‍ പാറേക്കടവില്‍ ഇന്നലെ രാവിലെ ആറരയോടെ വലയില്‍ കുടുങ്ങിയ പെരുമ്പാമ്പിനെ വാനപാലകര്‍ക്ക് കൈമാറി. കുളിക്കാന്‍ എത്തിയവരാണ് പാമ്പിനെ കണ്ടത്. കടവില്‍ മീന്‍ പിടിക്കുന്നതിനായി വിരിച്ചിരുന്ന വലയില്‍ കുടുങ്ങിയ നിലയിലായിരുന്നു. വെള്ളത്തില്‍ ശക്തമായ ശബ്ദം കേട്ടു കുളിക്കാന്‍ എത്തിയ രജീഷ്, ബിജു എന്നിവര്‍ വലിയ മീന്‍ കുടുങ്ങിയതാകാം എന്നു കരുതി നോക്കിയപ്പോഴാണ് പെരുമ്പാമ്പിനെ കണ്ടത്. തുടര്‍ന്ന് ഇവര്‍ വല കരയ്ക്ക് കയറ്റി പെരുമ്പാമ്പിനെ റോഡില്‍ എത്തിച്ചു. വനം വകുപ്പിനെയും പൊലിസിനെയും വിവരം അറിയിച്ചു. സംഭവം അറിഞ്ഞു പാമ്പിനെ കാണാന്‍ പ്രദേശവാസികള്‍ കൂടി. പരുത്തിപള്ളി റേഞ്ച് അധികൃതര്‍ എത്തി പെരുമ്പാമ്പിനെ വലയുടെ കുരുക്കുകളില്‍നിന്നു വേര്‍പ്പെടുത്തി പരുത്തിപള്ളി റേഞ്ച് ഓഫിസിലേക്ക് കൊണ്ടുപോയി. ഒന്നര വയസു പ്രായമുള്ള കുഞ്ഞു പെരുമ്പാമ്പിനെ വൈകിട്ട് കാട്ടില്‍ എത്തിച്ചു തുറന്നുവിടും.